SHILLONG: Meghalaya a·dokni damgittam autonomous district council (ADC)-rang account-rangko somoi gita on·jaenga ine CAG-ni chittio janapaniara namen jajrengna nangani ong·enga maina mikkangchiba iandake account-rangko name rakkijagenchimode aro somoi gita on·jagenchimode ma·mong sorkarini dakchakanirangko man·janaba gnang ine Mongolbar salo, a·dokni District Council Affairs (DCA) Minister Lahkmen Rymbui parakataha.
“Da·alona kingkingan chinga damgittam ADC-rangni aganchakaniko man·sokujaenga aro iako uamang ja·rikjagenchimode mikkangchi tangka paisarangni sokbaanirangko nangchakeatan baksana district council-rangna namgija bimingko ra·baani gita ong·gen,” ine Rymbui parakataha.
Damgittam ADC-rangni account-rangko on·kuja ine CAG-ni report-ko man·soani ja·man re·anggipa May 10 tarikon damgittam ADC-rang baksa tom·e chanchirimangahachim ine janapatengon, “ADC-rang sorkarini niamrango pangchaken account-rangko rakkina jotton ka·enga ine aganaha indiba CAG-ni report-o janapa gitan chinga uamangko iani bidingo aganchakaniko on·china u·iataha,” ine DCA Minister parakataha.
Iani bidingo a·dok sorkarina u·iatchina gitaba ADC-rangko aganataha aro dakchakanirangko nanggenchimode sorkari on·na man·gen ineba Rymbui parakataha.
Batanggimin bilsirango district council-rang, an·tangtangni finance department-rangko namdapatna jotton ka·ahachim ine janapatengon, district council-rango bang·en namdapatna nanganirang dongkuenga ine DCA Minister parakataha.
A·dokni damgittam ADC-rango indita bilsirangna account-rangko name rakkijaengania district council-rango tangka paisa jakkalsretaniko mesokani ong·enga ine CAG parakatahachim.
ADC-rango account-rangko rakkijaengani gimin 2022 bilsini March 17 tariko a·dokni Chief Secretary RV Suchiang-na, 2022 bilsini March 23 tariko damgittam ADC-ni chief executive membor-rangna aro March 30 tarikon a·dokni Chief Minister Conrad K Sangma-naba u·iatahachim indiba maming ja·kurangko de·jaha ineba CAG parakatahachim.
