TURA: Domestic Worker ba nokrango kam ka·e cha·enggiparangni mikkim aro bilrangni gimin manderangna u·iatna gita Mongolbar salo, Ferrando Domestic Workers Alliance (FDWA)-ni gita domestic worker-rangni tom·tome re·jomaniko Tura-o ong·atangaha.
Ia re·jomaniko Dakopgre-oni Matchakolgre Stephen Memorial School-ona ong·atangaha aro re·jomanio Tura jillani wilwilao donggipa dingtang dingtang nokrango kam ka·enggipa manderang gimik sak 400-mangni gita bakko ra·angaha.
FDWA-ni u·iatani gitade, nokrango kam ka·enggipa manderangni mikkim aro bilrangni gimin manderangna u·iatna gita a·gilsak gimikon Domestc Worker-rangni salko June 10 tarikoni June 16 tarikona manirongenga aro uandaken Tura-oba ia salko maniani bak gita jinma re·jomaniko ong·atangaha.
