TURA: Da·o gita chi banani somoirango aro tanggitik a·sel ong·ani somoirango manderangna dakchakanirangko on·na seokako man·gipa Aapta Mitra Volunteer-rangna Williamnagar-o East Garo Hills a·jani District Disaster Management Authority (DDMA)-ni gita training program-ko ong·atangaha aro ia program-ko ong·atanio East Garo Hills a·jani Deputy Commissioner L Ch Marak, mongsonggipa sokgipa ong·e bakko ra·angaha.
Ia training program-ko a·bachengatani somoio East Garo Hills a·jani Deputy Commissioner, Aapta Mitra Volunteer-rangna aganprakengon, East Garo Hills a·jao donggipa bang·bea chadamberangoniko seokako man·ahani gimin ia volunteer-ranga namen rasong gnanggiparang ong·a aro uamangni mongsonggipa daitoara, rang·gitik a·sel ong·ani somoirango manderangna dakchakanirangko on·anian ong·a ine talate on·angaha.
Rang·gitik a·sel ong·ani somoirangona an·tangtangko pangnan tarie dongchina volunteer-rangko didiangengon, banoba maiba a·sel ong·na nanggenchimode uamangan skanggipa ua biapona sokchengna nanga ine Marak didiangaha.
A·sel ong·ani somoirango maikai manderangna dakchakanirangko on·na nanga, uarangni bidingo name ma·sie ra·china gitaba ua volunteer-rangko didiangaha.
Ia program-ko ong·atanio Williamnagar-ni DDMO D Chyne-ba dongpae jinmana aganprakangengon, seokako man·gipa sak 100 volunteer-rangoni sak 40 volunteer-rangna skanggipa bako skie on·enga aro gipinrangnaba ja·mano skie on·anggen ine parakangaha.
Ia training program-ko Police, Civil Defence & Home Guards, Fire & Emergency Service, Medical Mobile Unit, Block Master Trainers aro gipin dolrang baksa nangrime ong·atenga ineba ua parakangaha.
Ia program-ko ong·atanio dongpae jinmana aganprakanggipa gipin manderangara, East Garo Hills a·jani ADC aro DDMA-ni CEO A Ch Marak, Additional SP S Synram, EAC Tochri R Sangma aro gipinrang ong·a.
