SHILLONG: Batanggimin bilsirang baksa tosusae nigenchimode ia bilsio SSLC porikkani result-rang Garo Hills-o namkalbataha indiba result-rangko namdapatna nangkuenga ine Budbar salo, a·dokni Education Minister Lahkmen Rymbui parakataha.
Rymbui-ni parakatani gitade, Garo Hills-o SSLC porikkani result-rangko namdapatna gita deputy commissioner-rang aro education officer-rangba raken kamko ka·aha indiba result-ko namdapatna gita rakbate kamrangko ka·na nangengkua.
“Garo Hills-o result-rang namkalbataha ine anga nikna man·aha indiba namdapatna nanganirang bang·en dongkuenga. Garo Hills-ni dingtang dingtang a·jarango porikkani result-rangko namdapatna gita deputy commissioner-rang aro education officer-rangba raken kamko ka·aha aro rakbate kamko ka·na nangengkua,” ine Education Minister aganaha.
Class 11 aro class 12-rango napna gita bang·bata chatro chatrirangan, sorkari skulrangko gale, mingsinggipa private skul ba college-rango admission-ko ra·tokengani giminba ua an·tangni suk ong·gijaniko parakataha.
Sorkari skulrango skigiparang dormaharangko nambate man·engoba private skulrangan mingsing minggamako man·batenga ineba Education Minister parakataha.
“Sorkari skulrango skigiparangde dormaharangkoba nambate man·enga aro training-rangkoba man·giminsa ong·a indiba uamang maini gimin chatro chatrirangna nambate skie on·na man·jaenga?” ine Rymbui sing·doangaha.
An·tangtangni result-rango chu·ongnike dongaigija mikkangchi nambate susaangna aro nambata result-rangko man·na krengchina gitaba ua chatro chatrirangko didiangaha.
