TURA: Re·anggipa antirangonin Garo Hills-o mikkarang dontonggija waanganichi, chi bananirangko aro a·a be·anirangko nikna man·engon, batanggimin konta 24-ni gisepo North Garo Hills a·jaoba mikka balwarang ta·rakangenba chi bananirangko aro dingtang dingtang biaprango bolrangni be·anirangko nikna gita man·angaha.
Official-rangni u·iatani gitade, Mongolbar salonin North Garo Hills a·jani bang·bata biaprangon mikka balwa ta·rakangaha aro uandaken onkalgipa biaprangode chi bananirangkoba nikna man·aha.
Batanggimin salrangonin mikkarang dontonggija waanganichi North Garo Hills a·jani Bajengdoba C&RD Block ning·o donggipa dingtang dingtang songrango chi bananirangko nikna a·bachengaha ine official-rang u·iataha.
Mikkarang jimbee waanganichi, Bajengdoba-oni Resubelpara aro Mendipathar-ona dakanggipa ramaoba bolrangni be·anirangko nikna man·aha aro uandaken Budbar pringo adita somoirangnade ia rama gita re·ruraenggipa gari gorarang jachange dongtokna gita nangaha ine official-rang parakataha.
Indake ong·genchimoba ja·mano District Disaster Management Authority (DDMA) baksana dingtang dingtang department-rang ta·raken kamko ka·enba, ia ramako watpilna gita man·aha ine kobor on·aha.
Mikkarang dontonggija waenganichi manderang neng·nikanirangko man·jana gita sorkari official-rang, nirikkie kamrangko ka·enga ineba kobor on·timgiparang u·iataha.
