Tura: Garo Hills-o mikka komiange chi dal·anirang chepangengani gimin manderang on·tisa rang·speani man·aha.
Batanggimin salsnion dondipgija mikka jime waanichi bang·a jolrangkon chi man·aha aro a·arang be·aha. Rama aro gipin infrastructure-rang nosto ong·tokaha. Indiba mikka komiangahani gimin obostarang ka·sinangkalaha. Indiba mikkangchi mikka waaniko agansoani dongani gimin gimik district-rangko simsake aro mikrake dongchina ge·etaha.
Mikka waanio mongsongbate South aro South West Garo Hills-o obostarang namjabataha. Sukrobar salo June 17 tariko South Garo Hills Baghmara aro Siju jolrango a·a rurongdape sakbri manderang siaha.
Siju-ko nangdimatgipa mongsonggipa ge·gni dolongkon chi man·angani a·sel jolni manderang re·na don·a neng·nikako man·tokenga. Minggipin NH 62 ramako namen nosto ong·aha. Bangladesh sima sepanggipa Rongara -ba Maheshkola mongsonggipa dolong be·ani gimin gipin jolrangoni chel·e dongna gita nangenga.
West Garo Hills (WGH)-oba mikka jime waanichi a·a rurongani a·selrangko bang·e nikna man·aha. Sonibar pringo Barengapra sepango donggipa bolni dolongko chi man·angaha. Indiba district-ni gipin bakrangode obosta namkalengjok. District-ni Deputy Commissioner Swapnil Tembe, mikka waanichi nosto ong·anirangko taripilna kamrangko a·bachengani gimin u·iataha. Uandake a·kawe jolrango chi dal·ani komiangengjok.
South West Garo Hills-oba bang·a manderangan noktangona re·angpiltokengjok. Bang·a jolrango chi komiangjok ine deputy commssioner SK Marak, koborna u·iataha.
“Mikka waanichi badita nosto ong·aha aro badita sakrang duk-neng·nikao ga·akaha, iarangko sandienga. Sandia matchote GR-ko parakatgen ine DC parakataha.
SWGH-o damgittam C&RD Block-ni ning·o ga·akgipa dam 1190 songrango donggipa sak 40,000 baten manderang neng·nikao ga·akaha. Relief camp-o donggiparangna GR-ko on·aha.
North aro East Garo Hills-o obostarang apsankuenga. Bajengdopa jolni chiba komiangaha.
