SHILLONG: Sima ari gita niamgri napbaaniko aro mande palbadingako champengna Bangladesh border ba sima jol sepango donggipa songni manderang baksa melie kam ka·enga ine Home Minister Lahkmen Rymbui, aganaha.
“Songni manderang, police dolrang baksa meligrike kam ka·enganiko nike kusi ong·a. Mnisalba border-ni VDP, sak 14 passenger-rangko salgipa gariko rim·aha. Uno Assam-oni saksa driver, jolni sakgni aro Bangladesh-oni sak 11 dongachim, uko rim·a man·a jolan songni manderang police-na kobor on·ataha aro police uamangko rim·aha ine Rymbui aganaha.
Bangladesh-oni manderangko srik palbadinga aro niamgri a·dokona napdraani bidingo sing·anirangna Minister, ia kattarangko talate on·aha.
Songni manderangan Bangladesh-oni niamgri re·bagiparangko rim·enga, ian songni manderangni ka·dongrakaniko mesoka.
“Dingtang dingtang district-rangoni police dolrang, Village Defence Party (VDP) baksa melie kam ka·enga aro songni dilgiparangba songo maiba ong·ronggija bewalrangko nika ong·ode jolan police-na u·iatenga.”
Uandake a·dok police BSF baksa bakrime kam ka·engama ine sing·ona, “BSF dolrang uamangni kamtangko namen ka·enga indiba batanggimin adita salrangonin mikka jime waengani gimin manderangko choko sandie ra·tokenga, indiba songni manderang namen mikrake donge kam ka·tokenga, re·anggipa antioba uamang niamgri re·bagiparangko rim·aha ine aganchakaha.”
