SHILLONG: Batanggimin antirango mikkarang jimbee waanganichi a·dok gimikon aro mongsongbate Garo Hills-o manderang neng·nikanirangko chagrongna nangahaoba, Sombar salonide mikkarang adita komiangnaba dongaha ine Indian Meterological Department (IMD)-oni u·iataha.
Shillong-o donggipa IMD-ni Scientist Rakesh Sharma-ni parakatani gitade, Robibar salonin a·bachenge Meghalaya a·doko mikka waani adita komiangnaba dongaha.
“Sombar salonide mikkarang komiangbatgnok ine chinga ka·dongsoenga. Badiaba badiaba biaprango mikkarang komie waangnaba gnang indiba batanggimin salrango jimanga gitade ong·jawaha,” ine Sharma parakataha.
Meghalaya a·dokni Chief Minister Conrad Sangma-ni parakatani gitade, Meghalaya a·doko chi banenggipani bidingo ua Union Home Minister Amit Shah baksa agangrikataha aro a·doko chi bananirangchi noksan ong·aniko hisapna aro nipilna gita ma·mong sorkari, dingtangmancha official-rangko a·dokona watatnaba gnang.
“Amit Shah-na a·doko ong·enggipa obostarangni gimin anga u·iatmanaha aro ua chu·gimik dakchakanirangko on·na ku·rachake, obostarangko nipilna gita ma·mongni dolko watatgen. Uni iandake aganchakaniko on·ahani gimin anga uko mittelpilna ska,” ine Sangma parakataha.
April 1 tarikonin Meghalaya a·doko mikkarang dontonggija waanganichi komibeoba sak 27 manderang siangna gita nangahachim aro dam 772 songrango donggipa gimik lak 5.86-mangni gita manderang neng·nikanirangko chagrongna nangtokahachim.
