TURA: Batanggimin salrango mikkarang dontonggija waanganichi, South West Khasi Hills a·jani Ranikor block ning·o donggipa Gilagora jolrangoba, a·arang rurongdape aro chirang banne bang·a nokdangrangan da·o cha·ani ringani gri, bijoli aro network-rang gri ong·e neng·nikanirangko chagrongna nangtokenga ine All Khasi Hills A·chik Federation (AKHAF) parakatenba, ia jolrango songdongenggipa manderangna ta·raken dakchakanirangko on·china sorkariko mol·molataha.
AKHAF-ni publicity secretary Sanggra Marak-ni parakatani gitade, Ranikor block-ni Gilagora jolrangoba mikkarang dontonggija waangani a·sel manderang neng·nikanirangko chagrongna nangtokenga aro mitam nokdangrangde cha·ani ringani gri ong·e dongna nangtokengachim.
“Ia jolrangoba mikkarang dontonggija waangani a·sel manderangni mirong donchakgipa biaprang, dokkanrang aro bazar antirangba bilongen nosto ong·atako man·tokaha. Ranikor-oni Baghmara-ona dongpagipa dilsamangmang ramaba da·o champengatako man·ahani a·sel ia songrango donggipa manderangna re·a doani cholrang dongsrangja gita ong·engaha,” ine AKHAF-ni publicity secretary parakataha.
Mikkarang jime waanganichi South West Khasi Hills a·jao nangchakeaniko man·batgipa biaprangara, Moheshkola, Ranikor, Ryngku, Rengdim aro Kallu jolrang ong·a ine talataniko on·angengon, ia biaprango donggipa manderang relief camp-rango dongchakenga indiba ia manderangna dakchakanirangko on·na nangenga ine AKHAF-ni publicity secretary, a·dok sorkariko mol·molataha.