NGH-o ra·gatgipa ma·mongni dingtang dingtang scheme-rangko Tura MP nianga

RESUBELPARA: North Garo Hills a·jao ra·gate ka·enggipa ma·mong sorkarini dingtang dingtang scheme aro program-rangko nipilna gita Sombar salo, Tura-ni MP Agatha K Sangma, District Development Coordination & Monitoring Committee (DISHA)-ni tom·aniko Mendipathar Multi Purpose Cooperative Society-o ong·atangaha.
Ia tom·aniko DISHA-ni chairperson ong·e Agatha Sangma dilangengon, North Garo Hills a·jao ra·gate ka·enggipa dingtang dingtang scheme aro program-rangni gimin sing·sandie ra·angenba, ma·mong sorkarini ra·gatgipa scheme-rangko somoi gita matchotatna man·na gita kamrangko nambate ka·china, a·jani officer-rangko didiangaha.
Ia scheme-rangni bidingo chubata gadangrango donggipa official-rang baksa agangrikanggen ine janapatengon, ma·mong sorkarini ra·gatgipa scheme-rangko nambate chu·sokatna gita tangka paisarangko somoi gita sokatna, bakrimaniko on·china Tura-ni MP, North Garo Hills a·jani officer-rangko didiangaha.
Ia tom·aniko a·bachengatanio North Garo Hills a·jani Deputy Commissioner RP Marak, jinmana aganprakangengon, ia DISHA-ni tom·aniko, sorkarini scheme-rangni gimin ma·sie ra·na gita ong·atenga ine talataniko on·angaha. North Garo Hills a·jao COVID-19-ni obostarang da·o namkalangaha ineba Marak parakataha.
Ia tom·anio sorkarini dingtang dingtang scheme-rang, jekai PWD, PMGSY, MGNREGS, PMAY-G, NSAP, NRLM, PHE-JJM, Water Resources, ICDS aro uandakgipa scheme-rangni gimin Tura-ni MP, North Garo Hills a·jani officer-rang baksa chanchirimangaha.
Ia tom·anio dongpae bakko ra·anggipa gipin manderangara, Resubelpara-ni MLA Timothy D Shira, Kharkutta-ni MLA Rupert Momin, Mendipathar MLA Marthon Sangma, Bajengdoba MLA Pongseng Marak aro gipinrang ong·a.

Get real time updates directly on your device, subscribe now.

Comments are closed.