SHILLONG: Re·anggipa May jani 30 tariko Joefreeson Jana minggipa mande saksani jako so·ota man·gipa bi·sa sakgnini nokdangna a·dok sorkari, gong lak 5 tangkarangko ‘ex-gratia’ dake on·na tik ka·angaha ine Meghalaya Assembly Committee on Empowerment of Woment (MACEW) parakataha.
May jani 30 tariko pagipa saksani degipa sakgniko so·ote galanichi a·dok gimikon an·jrimataniko ra·bagipa obostani bidingo Sombar salo, a·dokni Director General of Police (DGP) Lajja Ram Bishnoi, Meghalaya State Women Commission (MSCW)-ni Chairperson Phidalia Toi aro Meghalaya State Commission for Protection of Child Rights (MSCPCR)-ni Chairperson Iamonlang M Syiem, MACEW-ni memborrangni mikkango dongpaenba, ia a·selko committee-na pakwate on·angaha.
Iani bidingo kobor ra·timgipa manderang baksa agangrikengon, so·ota man·gipa bi·sa sakgnini nokdangna on·na sienggipa tangka paisani gimin Social Welfare department kam ka·engaha ine MACEW-ni membor-rangna u·iataha ine MACEW-ni Chairperson Ampareen Lyngdoh parakataha.
“Ia nokdangna ta·raken tangka paisarangko sokatgen ine chinga ka·dongenga maina ian kachario dakgrikna gita ia nokdangna dakchakani ong·gen,” ine Lyngdoh parakataha.
Ia misilbegnigipa kamna committee namen suk ong·ja ine janapatengon, ia me·chik bi·sa sakgnini ma·gipako ka·saninggija dake jakkalani bidingo aro ia me·chikni badi ka·ani bidingo police-rang, MSCW aro MSCPCR apsan asonge chanchirimna nangenga ine Lyngdoh parakataha.
Mikkangchi iandakgipa a·sel ong·anirangko chel·chakna man·na gita police station gimikon iandakgipa a·selrangni bidingo report ka·anirangko nambate nirok sandina nanga ineba MACEW-ni chairperson parakataha.
Ia bi·sa sakgni janggitangtangko gimaatna nangahani gimin uamang, ia nokdangna kakket bichalko man·e on·na gita rake kamko ka·gen ineba Lyngdoh parakataha.