WKH, SGH-ni duko ga·akgipa nokdangrang sorkarini gita dakchakaniko man·jaenga

Nongstoin: South Garo Hills aro West Khasi Hills (WKH) district-rangoni komibeoba dam 6 songrang, mikka jime waanichi chibana, a·a ruronga ba uandakgipa a·selrango duko ga·akgiparangko sorkari nichanga, da·onaba sorkarini gita maming dakchakaniko man·kujaenga ine agantokaha.
Kalu (GH), Kalu (KH), Rengdim, Wakpongram, Bokchung aro Nengchigen jolrango mikka jime waanichi obostarang namjabataha, rama-ja·langrang nosto ong·toke nen·nikako man·tokenga. June 17 tariko mikka jimbate waanichi obostarang bilongaha indake salbri-salbonga gappilengjok, da·onan sorkari aro district administration-ni gital maming sandianiko ba dakchakaniko dongja.
Jolni manderangni aganani gitade, songni bang·arangan nok-jamtangko gimaatokaha, uamangna janggi tangna maming cholrang dongjaha, mikka -chima dal·ani a·sel uamangna dal·bea dukni sokaha.
Indake ong·engon West Khasi Hills-ni All Khasi Hills Nokma Welfare Association Rengdim unit, chibana a·selo duko ga·akgiparangko dakchakna gimikna skangba uamangan sokangaha.
“Association, duko ga·akgiparangna nangchongmotgipa bosturangko brena gita tangka-paisako on·gile dakchakaha. Chingni chairman Alphonse Marak-ni re·dilanio neng·nikao ga·ake donggiparangona sokange uamangni duk-neng·nikako on·tisa olgrokatna man·aha. Indiba ian chu·onga ong·ja, sorkari aro administration-ko dakchakaniko nangenga, da·onaba sorkarini gita maming dakchakani sokkujaengani gimin suk ong·gijaniko association-ni membor Zimychyrst G Momin aganataha.
Association, komibeoba nokdang ge 30-na gong 6000 tangkako on·e dakchakangaha.
“Songni manderang nok-jamrang, matchu-matte aro gipin jilanirang aro nokni gamchatgipa bosturangko gimaatna gita nangaha. Uamang cha·namangmangba cha·anian dongjajok. Ia nokdangrang sorkarini gita maming dakchakaniko man·kujaenga.  Iandakgipa somoio chinga skanggipa ong·e sokange uamangko dakchakna cholko man·ahani gimin kusi ong·beaha. Mikkangchiba chinga uamangko dakchakna kam ka·angkugen ineba Zimychryst agankuaha.

Get real time updates directly on your device, subscribe now.

Comments are closed.