SHILLONG: Mni Sukrobar salo Shillong Jaiaw-o Kerala-ni sakgni chadambeko chadrapani mamlako Meghalaya Police, sandienga. Police-rang CCTV footage-ko nie obosta ong·ako talna jotton ka·enga.
CCTV footage-ko name dake nia ja·man, dos dakgiparangni kosako ja·ku de·gen ine Sonibar salo Meghalaya DGP, LR Bishnoi, koborna parakataha.
Jaiaw-o iandakgipa chadrapani a·sel ong·ako changni chang knana man·enga gimin sing·on, ‘jemangan iandakgipa kragija kamrangko ka·enga, uamang iandakgipa kamko dondipatna nanga aro maiba neng·nikanirang dongode mikkangona re·bae agangrikchina,” ine agandapaha.
“Jemangan golmal ka·enga, uamang maiba neng·nikanirang dongode, mikkangona re·bae agangrikchina, chinga agangrikna tarie donga, indiba sakgipinrangko chadrape ba golmal ka·e a·dokni bimingko nosto ka·jachina,” ine DGP mol·molataha.
Minggipin North Shillong MLA Adelbert Nongrum-ba Jaiaw-o iandakgipa obostarang batrikrikengani gimin jajrengate, ja·ku de·china aganataha.
“Iandakgipa obostarangara, an·chingni a·dokni bimingkosan ong·siatgen, maming namgniko ra·bajawa.”
Indake denggu dakgipa dolrangko iandakgipa bewalrangko dontongchina mol·molataha aro maiba neng·nikarang dongode agangrikna man·gen ine parakataha.
Iandake obosta da·osa ba skanggipa changna ong·enga ine ong·ja, iana skangba apsan dakgipa obostarangko nikna man·aha, jeni a·sel a·dokni biming nosto ong·enga.
Minggipin Sukrobar salo ong·gipa obostani gimin Rangbah Shnong, da·onan maming kattakon aganata dongkuja aro a·sel ong·ako jegalataba dongkujaenga. Chief Minister Conrad Sangma, jean bang·a changon a·doko maiba obostarang ong·ao jolan twitter-o ku·rangko on·atronga, da·ode Jaiaw-ni mamlao mamingkon aganata dongkujaenga.
