Da·o dipet Mylliem constituency-o People’s Democratic Front (PDF)-ni Hamletson Dohling, MLA ong·engachim ine nikna man·a. Da·o dipet NPP-chi dilenggipa MDA sorkario PDF dolba bak ong·skaengachim ine nikna man·a.
Indake ong·engon, batanggimin changrango NPP dol, Mylliem constituency-o candidate-ko susaatjahaoba ia changode bang·bate seat-rangko chena miksongengani gimin Mylliem constituency-oba candidate-ko susaatna tik ka·angaha ine NPP-ni national president parakataha.
“Chinga re·baenggipa bilsini election-na doltangko tarisamsona a·bachengaha aro ia chang election-o chinga bang·bata constituency-rangon candidate-rangko susaatna miksongengani gimin dingtang dingtang cholrangkoba nina nangenga. Re·baenggipa 2023 bilsini election-oba chinga bilaken susana ka·dongsotaienga,” ine Sangma parakataha.
Re·baenggipa 2023 bilsini Assembly election-o Mylliem constituency-oni susana gita parakatgimin candidate-rangara, Congress dolni MDC RV Lyngdoh, Laban-Mawprem-ni MDC Mitchel Wankhar aro Mylliem-ni gitcham MLA Pynshai Manik Syiem ong·engachim ine nikna man·a.