SHILLONG: Sombar salo, a·dokni Chief Minister Conrad K Sangma, Upper Shillong-ni Umlyngka-o gital rikgipa Milk Collection Centre ba dud chimongchakani centre-ko nokdonggae on·angaha aro ia dud chimongchakani centre-ko nokdonggae on·anganio a·dokni C&RD Minister Hamletson Dohling-ba dongpae bak ra·angaha.
Ia Milk Collection Centre-ara Umlyngka Primary Milk Producer Cooperative Society Limited-ni centre ong·a aro ia centre-ko Chief Minister’s Special Rural Development Fund (CMSRDF) aro Special Rural Works Programme (SRWP)-ni ning·o gong lak 37-mang koros ong·e rikahachim.
Ia gital kuligipa Milk Collection Centre-o chilling unit aro ia biapo chimongenggipa dudrangko porikka ra·e nina gita testing unit-koba donaha.
Ia dud chimongchakani centre ba biapko nokdonggae on·angani somoio a·dokni Chief Minister Conrad K Sangma, jinmana aganprakengon, ru·utbea bilsirangna dudrangko badinge da·o ia dud chimongchakani centre-ko kulina man·ahani gimin Umlyngka Primary Milk Producer Cooperative Society Limited-ko mittelpilangaha.
A·doko dudrangko man·ani 50-60 percent-mangni gita chu·ongjaenga ine janapatengon, ia chu·onggijaniko gapate an·tangtangnaba man·gnirangko ra·baskachina gita Chief Minister, a·doko dud badinge cha·enggipa manderangko didiangaha.
