SHILLONG: Mawmluh Cherra Cement Limited (MCCL)-o kam ka·enggipa manderangni dormaharangko on·na man·na gita jagittamprako gong kror 2 tangkarangko a·dok sorkari dakchake on·na ku·rachake on·ani ja·man, ia tangka paisarangara MCCL-na chu·ongjawa ine tangka paisani gita dakchake on·aniko bariatchina Sohra-ni MDC aro Shella-ni MLA, a·dokni Chief Minister Conrad K Sangma-ko didiangaha.
MCCL-o kam ka·enggiparangni dormaharangko on·na man·na gita jagittamprako gong kror 2 tangkarangko sorkarini on·na ku·rachakatani ja·man, KHADC-ni CEM aro Sohra-ni MDC Titosstarwell Chyne baksana Shella-ni MLA Balajied Kupar Syiem, a·dokni Chief Minister-ko grongenba, MCCL-na tangka paisani gita dakchake on·aniko bariatchina mol·molangaha.
“Chinga ia jolrangko dilna seokako man·gimin manderang ong·e, MCCL-o kam ka·enggipa manderangni neng·nikanirangko nikna namen duk ong·a. MCCL-o kam ka·enggiparang neng·nikanirangko man·jachina gita chinga Chief Minister-ko gronge dakchakanirangko on·china mol·molaha,” ine Chief Minister-ko grongeani ja·man KHADC-ni CEM aro Sohra-ni MDC Titosstarwell Chyne parakataha.
Meghalaya a·dokni Chief Minister Conrad K Sangma aro MCCL-ko chalaienggipa manderangni gisepo tom·e chanchirimangani ja·man, MCCL-o kam ka·enggiparangna dormaharangko on·na man·na gita gong kror 2 tangkarangko jagittamprakon MCCL-na on·na manchiangaha ine Jowai-ni MLA Wailadmiki Shylla parakatahachim.
Shylla-ni parakatani gitade, re·anggipa antio MCCL-o kam ka·enggipa manderang, MCCL-ni official-rangko grongenba, an·tangtangni dormaharangni bidingo a·dok sorkarini gita dakchakaniko on·china didiangahachim aro uandaken, MCCL-o kam ka·enggiparangna dormaharangko on·na man·na gita a·dok sorkari, gong kror 2 tangkarangko jagittamprakon on·na ku·rachakaha aro MCCL-o man·enggipa neng·nikanirangko namatna man·kujaskal sorkari iandake dakchakanirangko on·angna ku·rachakataha.
