TURA: Williamnagar-o donggipa Chidekgre Higher Secondary School-ni gitcham principal Robinus T Sangma, adita sak Nokmarang baksa Janata Dal (United) dolo napaha ine kobor on·aha.
Koborko on·ani gitade, Chidekgre Higher Secondary School-ni gitcham principal Robinus T Sangma, JDU-ni national general secretary Afaque A Khan aro gipin dilgiparangni mikkango JDU-o napangaha.
Ia JDU dolara, Bihar a·doko sorkariko chalaienggipa dolrangoni dolsa ong·a aro da·o dipet JDU-o sak 16 Lok Sabha MP-rang aro sak 5 Rajya Sabha MP-rang donga.
Salgro salaram a·dokrangoba JDU dolni dilgiparang, Arunachal Pradesh a·doko sak 7 MLA-rang, Manipur a·doko sak 6 MLA-rang aro Nagaland a·doko MLA saksa dongahachim.
“Meghalaya a·dokoba bakan JDU tang·dobagen ine chinga ka·dongenga aro Meghalaya a·dokna chinga office bearer-rangko seokmanahaon jinmana u·iatgen,” ine JDU-o napangani ja·man Sangma parakataha.
