TURA: Batanggimin somoirango mikkarang dontonggija waanganichi West Khasi Hills a·jani Khalu aro uandakgipa dingtang dingtang songrango chirang banne aro a·arang rurongdape bang·a nokdangrangan neng·nikanirangko chagrongna nangtokahaoba, iandake duko ga·akenggipa songni nokni manderangna dingtang dingtang cholrangchi dakchakanirangko on·ahani gimin dakchake on·gipa pilak dol aro manderangkon West Khasi Hills a·jao donggipa All Khasi Hills Nokma Welfare Association (AKHNWA) Rengdim unit mittelpilataha.
AKHNWA-ni general secretary aro Khalu Nokmani depante Zimichryst G Marak-ni u·iatani gitade, chirang bananichi aro a·arang ruronganichi West Khasi Hills a·jani bang·a biaprangon manderang, nok-jamrangko, bagan barirangko, jilla kaanirangko aro rama jal·langrangko gimaatna nange neng·nikanirangko chagrongna nangtokaha indiba dingtang dingtang dolrang, Khalu, Rengdim, Bokchung, Nengchigin aro Rongcheng songrangona re·ange, manderangna cha·ani ringani bosturang, ganding chindingrang aro gipin nangchongmotgipa bosturangko on·giletokahachim.
“Ia songrango donggipa manderangni duk mikchini somoio aro neng·nikanirangko chagrongna nangengmiting somoirango nangchongmotgipa bosturangko aro pilak nanga dakchakanirangko on·ahani gimin anga dingtangmancha, Nokma Welfare Association, Rongara Block-ni official-rang, Rongram Block-ni official-rang, Opposition dolni dilgipa Dr Mukul M Sangma, Baghmara DC office, Southern Wonderlous, A·chik Heritage Pursuits, Gasuapara jolni manderang, Tura adventure club, United Churches Assembly Youth (UCA, Tura), Mothers Union Tura, Mawshynrut Constituency-ni MLA Gigur Myrthong, Siju-Rongara-ni MLA Rakkam A Sangma, Rongram NRLM-ni Self Help Group, Delhi A·chik Society aro Garo Hills-ni SBI dolko mittelpilna ska. Uamangni chingna ka·sabee dakchakanina chingo uamangna mamingkoba on·pilskana dongjagenchimoba chinga uamangko chingni gisik ka·tong gimikchi mittelpilenga aro uamangko chingni bi·anirango gisik ra·na ku·rachakenga,” ine AKHNWA-ni general secretary parakataha.
Mikkarang jimbee waanganichi Khalu-o skul nok te·gni, community hall te·gni, Khalu-o gilja nok te·gni, Rengdim, Rengchi aro Khalu jolo donggipa jal·langrang aro bijoli krongrang nosto ka·ako man·angaha ine janapatengon, nosto ka·a man·gipa biaprangko taripilna gita dakchakanirangko on·china ua, jolni MLA-rangko aro a·dok sorkariko didiataha.
