SHILLONG: Re·baenggipa July-ni 18 tariko ong·atna sienggipa Presidential Election-o NDA-ni candidate ong·e susaenggipa Droupadi Murmu, Budbar salo Shillong songjinmaona re·baenga.
Ia election-o an·tangna chakpaaniko on·china gita ua a·songni dingtang dingtang biaprangona wenroroe, dingtang dingtang dilgiparangko grongengachim ine nikna man·a.
Murmu-ni Shillong-ona re·baengani bidingo BJP-ni MLA AL Hek, talataniko on·angengon, Budbar attamchibara ua Umiam Lake resort-o dingtang dingtang political dolni dilgiparangko gronge agangrikanggen ine parakataha.
President-ni election-o Murmu chegipa ong·gen ine an·tangni ka·dongchakenganiko parakatengon, uni Shillong-ona re·baanio ua dingtang dingtang political dolni dilgiparangko an·tangna chakpachina didigen ine Hek parakataha.
“Meghalaya a·dokni dingtang dingtang dilgiparangna angni mol·molanide iasan, Murmu saksa a·songni President-na skanggipa Tribal me·chik ong·e susaengani gimin pilak political dolrangkon politics-ni gita chanchigija una chakpaaniko on·china mol·molenga. Tribal me·chik a·songni President ong·genchimode uan Tribal jatrangna mikkim rasongkob ra·baani ong·gen,” ine Hek parakataha.
