Shillong: A·doko nambate cement-ko tarigipa aro manderangni jakkalna namnikbatgipa, Star Cement, tangka lakh 5-ko, a·doko chi banachi neng·nikako man·enggipa biaprangna, Chief Minister’s Relief Fund-o on·angaha. Batanggimin jao mikka jimbee sal wal waanichi, a·dokni bang·a biaprangon a·a rue aro chi bana neng·nikanirangko man·aha. Chi bananichi, dingtang dingtang biaprango donggipa manderang, noktang jamtangko wate, highway aro skul nokrango tusina aro dongchakna gita nangaha. Manderangni neng·nikaniko nike, Star Cement tangkako on·e dakchakna gita tik ka·e ra·bae, CM Relief Fund-o on·angaha.
Indake, Star Cement namgipa kamrangna, Meghalya a·dokni Chief Minister, Shri Conraad K. Sangma de·mittele aganangaha. ”Neng·nikani somoirango, indake namgipa kamrangchi manderangna dakchakaniko on·aniara, manderangna ka·dongani aro kusiniko on·a gita ama,” ine Sangma aganangaha.
Tangkarangko on·e dakchakani gimin, Star Cement-ni, Vice Chairman aro Managing Director, Shri Rajendra Chamaria indake aganangaha, ”Meghalaya a·dokni nangchongmotgipa somoirangko dakchakna gita, Star Cement pangna kusi ong·a. Ia kamrangna agreba chinga, chi bananichi neng·nikaniko man·enggipa manderangna cha·anirangko on·e dakchakangaha aro chi bananirang namja dipet chinga apsan dakgipa kamrangkon ka·angkugen.”
Star Cement-ni, Executive Director, Shree Tushar Bhajanka-ba, a·doko chi banani gimin indake aganangaha, ”A·dokni bang·a biaprangon, bang·a manderang da·onaba chi banani a·sel neng·nikaniko man·kuenga aro iarangko nike chinga name duk ong·a. Indiba, indake rakgipa obostarango an·ching saksa sakgipinko dakchakna apsan ku·mong nangrime kamrangko ka·na nanga. Chinga, Star Cement-ni gita neng·anio ga·akgipa manderangona sokna aro dakchakna gita raken jotton ka·aha.”
Indake, Rupees Twenty Five Lakh-ni cheque-ko, Star Cement-ni, Senior Executive, Shri Suresh Shovasaria, Meghalaya a·dokni, Chief Minister, Shri Conrad K. Sangma-ni jako on·angaha. Cheque-ko on·ani ja·mano, Star Cement-ni management-rang, chi banachi neng·nikaniko man·enggipa manderangna man·atangtang gita on·gile dakchakaniko on·china didiangaha.
