TURA: Assam aro Meghalaya sorkarirangni memorandum of understanding (MoU)-o soi ka·grikanichi Assam a·doko man·angenggipa A·chik songrangko man·bapilna gita Garo Hills-o songdongenggipa manderangkoba dakchakgrimchina aro an·tangtangni man·a gita on·gilpachina Garo Hills-ni dolbri NGO-rang, chong·motan ADE, AYWO, FKJGP aro FAF dolrang mol·molataha.
Dolbri NGO-rangni parakatani gitade, Assam aro Meghalaya sorkarirangni MoU-o soi ka·grikanichi Meghalaya a·doko ga·akgipa mitam A·chik songrangko Assam-o napatahani a·sel ia songrango donggipa manderang aro ia jolrango donggipa dingtang dingtang dolrang, Garo Hills-ni NGO-rangkoba dakchakchina mol·molatahani gimin batanggimin somoirangoba ia dolrang, changni chang jinma tom·bimonganirangko ong·ate ia MoU-ko den·galpilchina Meghalaya sorkariko aro a·dokni Chief Minister-ko didiahachim indiba a·dok damgnini sorkarirangan ia MoU-ko den·galpilna aro ia kamko nipiltaina jechakskaengachim.
“Meghalaya a·doko ga·akgipa A·chik songrangko Assam-o napatengani a·sel ia songrango donggipa manderang duk mikchirangko chakna nangengani gimin chinga changni chang a·dokni dilgiparangko aro a·dok sorkariko mol·molahaoba chingni mol·molanirangko knachakna gisiko nangjaenga. Uni gimin A·chikskani duk mikchini somoio dakchakaniko on·na gita Garo Hills-o songdongenggipa manderangba ja·kuko de·na nangenga,” ine ADE-ni president Dalseng Bira Ch Momin parakatenba, ia songrango donggipa manderangna an·tangtangni man·a gita on·giltokchina Garo Hills-ni manderangko mol·molataha.
A·dok damgnini gisepo soi ka·grikgipa MoU-ko ra·piljagenchimode Mallangkona jolrango songdongenggipa manderang jingjengatanirangko dakna ka·mikkenataniko on·angahachim ine nikna man·a.