SHILLONG: Sorkari officer saksa Salgira Marak, Sombar sal dipet Printing & Stationery department-o director-ni kamko jako ra·epilaha.
Re·anggipa June-ni 7 tariko Meghalaya High Court-ni ge·etaniko man·enba, kamtangko jako ra·epilchina gita Printing & Stationery department-ni Secretary Matsiewdor War, July-ni 6 tariko ge·etaniko on·atskaaha aro uandaken Marak, Sombar sal dipet kamtangko jako ra·epilaha.
“Bilsi gittamna kachario dakgrikani ja·man da·o anga kamtangko jako ra·piltaina man·e namen kusi ong·aha. Angko director-ni kamo donpilchina gita kacharini ge·etaniko da·o bon·kame a·dok sorkari knachakaha,” ine Marak aganaha.
June jani 7 tariko kacharini ge·etani gita kamko ka·jahani gimin ua a·dok sorkarini kosako maming ja·kurangko de·dapna nangnikjaengaha ineba Marak parakataha.
June jani 7 tariko kacharini ge·etaniko on·ata intalan ua office-ona re·baengachim ine janapatengon, “Ua somoio angni office-ko tala teke donahani gimin anga a·palosa dongna gita nangaiachim indiba iandake sorkari, kacharini ge·etaniko manijahani gimin anga jasani ja·man sorkarini kosako mokordoma ka·pangpilna tik ka·ahachim,” ine Printing & Stationery department-ni director parakataha.