WILLIAMNAGAR: Re·baenggipa 2023 bilsini Assembly election-ni ja·man All India Trinamool Congress (AITC) chegipa ong·e sorkariko rikna man·genchimode, Assam aro Meghalaya a·dokni simarango ong·enggipa obostarangko namatna gita dolgni sorkarirangni soi ka·grikgipa Memorandum of Understanding (MoU)-ko den·galpilgen ine Opposition AITC-ni dilgipa aro Meghalaya a·dokni gitcham Chief Minister Mukul Sangma, ku·rachakaniko on·angaha.
Ia ku·rachakaniko ua Mongolbar salo, AITC Rongjeng Block Committee-ko songna aro member-rangko segatna tom·aniko ong·atanio on·angaha.
Tom·a matchotani ja·mano kobor ra·timgipa manderang baksa agangrikengon, Assam aro Meghalaya sorkarirangni songgigrike Meghalaya a·dok ning·o ga·akgipa A·chik songrangko Assam-o napatani ja·man da·o ia songni manderang neng·nikanirangko chagrongna nangtokengaha ine knasoenba namen ka·a be·aha ine Mukul Sangma parakataha.
“Assam aro Meghalaya a·dokni sima jolrango donggipa an·chingni manderangko Assam sorkari, kal·ake rona jotton ka·enga. Iani bidingo dingtang dingtang political dolrang aro a·doko songdongenggipa manderang changni chang ku·rangko on·ahaoba Meghalaya sorkari, an·chingni ku·rangko knachakna gisiko nangjaenga,” ine AITC-ni dilgipa parakataha.
Sima jolrango songdongenggipa manderang iandakgipa dukrangko chakna nangjana gita sorkari kamko ka·gen ine ua ka·dongsoengachim indiba a·doktango songdongenggipa manderangni mol·molaniko knachakani pal ia sorkari, a·doktangni manderangkon galchipskaaha ineba Sangma parakataha.
Dolgni sorkarirangni soi ka·grikgipa MoU-ko manderang jegaltokenga ong·ode maini gimin iako sorkari ra·pilna man·jaenga ineba Sangma sing·doangaha.
“Manderangni seokako man·giparang ong·e chingni dakna nanggni kamde an·tangtangni manderangko chel·chakanian ong·a, uni gimin re·baenggipa bilsio chingko bilona watatgenchimode chinga iako ra·galpilna ku·rachakenga,” ine AITC-ni dilgipa parakataha.
AITC bilona re·baode Assam-M’laya-ni gisepo songgrikaniko ra·galpilgen: Mukul
Date:
Share post:
