SHILLONG: Meghalaya a·doko drugs ba pekatgipa sam badinganiko champengchina gita Meghalaya sorkari, Home aro Police department-rangna ge·etaniko on·angaha.
A·dokni Chief Minister Conrad K Sangma-ni parakatani gitade, jagnimangna skang iani bidingo tom·e chanchirimani ja·man a·doko niam gri sam badingani aro jakkalanirangko champengna gita police-rang bilakbate kamrangko ka·na a·bachengaha.
“A·doko niam gri sam badingani aro jakkalaniko bilakbate sandienba, jak donggipa manderangko rim·china Home aro Police department-na ge·etaniko on·manaha,” ine Chief Minister aganenba, batanggimin salrango niam gri sam badinggipa aro jakkalgipa manderangko rim·na man·ahani gimin police-rangko mittelpilataha.
Batanggimin sal 30-ni gisepo police-rang, a·dokni dingtang dingtang biaprango niam gri sam badingenggipa aro jakkalenggipa manderangko am·sandienba, bang·en rim·na gita man·ahachim.
Mongolbar saloba, West Jaintia Hills a·jani police-rang, Guwahati-chipakna re·angenggipa truck gari bolsaoniko gong kror 3.5-ni kg 1,168.182 ong·gipa ganjarangko rim·na man·ahachim.
West Jaintia Hills a·jani SP Bikram D Marak-ni u·iatani gitade, ia pekatgipa bosturangko police-rang, Mookyndur checkpoint-o garirangko nirok sandiengmiting somoio rim·na man·ahachim. Ia truck garioniko police-rang, bosta 80 ganjarangko man·ahachim.
Iana skangba police-rang, gong krorsani gram 676 ong·gipa heroin sam baksana strip 30 Nitrazepam tablet-rangko rim·an baksana adita sak manderangkoba rim·na man·ahachim.
