SHILLONG: New Shillong Township-o rikenggipa gital Assembly building-ni be·gruaniko am·sandienggipa Indian Institure of Technology (IIT-Guwahati)-ni skanggipa report-ko PWD (Buildings)-na on·angaha. Ia skanggipa report-o Assembly building-ni left wing ba jakasi grangni bidingo audit ka·aniko parakangaha.
Bristibar salo, PWD (Buildings) official saksani kobor ra·timgiparangna parakatani gitade, IIT Guwahati-ni sandie man·chenggipa report-o ia gital Assembly building namen dongenga ine parakahachim.
Ia gital Assembly building-ni protchong be·gruanio ia nokni jakasi aro jakra wingrangoba maming nosto ka·ako man·jaha ine PWD official parakataha.
PWD (Buildings) official-ni aganani gitade, ia noko chone be·srianirangsan dongaia aro dal·e nosto ong·anirang dongja ineba IIT Guwahati-ni manderang parakataha.
“Final report-ko on·na gitade ia building-ni bidingo audit ka·enggipa dol adita somoirangko nangkugen,” ine PWD official parakataha.
Indake ong·engon, ia gital nokko audit ka·enggipa IIT-G-ni manderang da·o ia gital nokni protchongni bidingo am·sandianirangko dakna a·bachengataha ine PWD (Buildings)-ni official parakataha.
Ia protchongni bidingo audit ka·ani report-ko name am·sandichengenba, jagnini gisepon on·gen ineba ua parakataha.
New Shillong Township-o gital rikenggipa Meghalaya Assembly building-ni protchong be·gruani a·selko re·anggipa jaonin, Guwahati Indian Institute of Technology (IIT)-ni sakbonga membor-rang sandirokna a·bachengatahachim.
Ia gital Assembly building-ni metric ton 4000-na batgipa protchong, May 22 tarik pringwalo be·gruahachim aro ia protchong be·gruani ja·man, dingtang dingtang political dolrang, NGO-rang aro a·doko songdongenggipa manderangba, ia nokko rikani bidingo sorkariko sing·doenba, CBI-chi inquiry-ko dakchina dabitokahachim.
