SHILLONG: Assam aro Meghalaya a·dokni simarango meligrikgijanirangko namatna gita a·dok damgnini gisepo songgigrikaniko politics kal·jachina aro ia jolrango songdongenggipa manderang ru·utbea bilsirangonin dukko chake da·o pangkamgipa namatanina senge dongengmitingo ia jolrango songdongenggipa manderangko ding·chaoatjachina National People’s Party (NPP) dol, a·dokni Opposition Meghalaya Pradesh Trinamool Congress (MPTC)-ni dilgipa Mukul Sangma-ko didiataha.
Chief Minister-ni parakatani gitade, bilsichetna skang Congress dolni dilanichi uamangni sorkariko chalaiengmiting somoio, Assam aro Meghalaya a·dokni simarango ong·enggipa obostarangko namatna gita maming ja·kurangko de·jahachim aro da·o NPP-chi dilenggipa MDA sorkarini maikoba chu·sokatahaon, iako uamang ra·gale galpilnasa jotton ka·skaengachim.
“Sima ari jolrango ong·enggipa obostani bidingo uni iandakgipa kattarangko knae anga suk ong·ja. Kakketko agangenchimode uamang bilsichetna sorkariko chalaiengmiting somoirangoba iani gimin mamingkon dakjaha aro da·o chinga maikoba dake mesokahaon uamangko uko ra·gale galpilnasa jotton ka·skaenga,” ine Sangma aganaha.
Re·baenggipa 2023 bilsini Assembly election-o All India Trinamool Congress (AITC)-ko cheate sorkariko rikna chol on·genchimode, Assam aro Meghalaya a·dokni gisepo soi ka·grikgipa Memorandum of Understanding (MoU)-ko den·galpilgen ine adita salrangna skang Opposition AITC-ni dilgipa Dr Mukul Sangma aganahachim ine nikna man·a.
A·dok damgnini simarango meligrikgijanirangko namatna kam ka·engon, wa·rengrangko salchengesa aro survey-rangko dakchengesa ka·na nangachim ine Mukul Sangma-ni agangipa kattarangko jegalatengon, ia map aro survey-rangko uamangni sorkariko chalaiengmiting somoirangon tariaha ine Conrad parakatskaaha.
“Batanggimin baditaba jarangnade uamang iani bidingo maming kattarangko janapjaha indiba da·o election sepangbaengahaon uamang iani bidingo ku·rang on·na a·bachengskaengaha,” ine Sangma aganaha.
Indake ong·engon, Congress sorkarini somoio Langpih-o dosgri manderangko Assam police-rangni goe galani bidingo Congress sorkari maming ja·kurangkon de·na pa·jaha aro da·o uamang MoU-ko ra·galpilani gimin aganbaenga ine NPP-ni state president aro Rajya Sabha MP WR Kharlukhi-ba parakataha.
