SHILLONG: Assam aro Meghalaya a·dokni simarango meligrikna man·jaenggipa biaprangko namatna gita 2011 bilsio gitcham sorkarini a·kanggimin biaprangko, NPP-chi dilenggipa MDA sorkari, Assam sorkari baksa MoU-o soi ka·grike bak dakattaiaha ine Sukrobar salo, Opposition dolni dilgipa Mukul Sangma matnangataha.
Iani bidingo kobor ra·timgipa manderang baksa agangrikengon, 2011 bilsio uni sorkari, pilak tarina nanggipa lekkarangko matchote Assam sorkarina on·manahachim ine Meghalaya Pradesh Trinamool Congress (MPTC)-ni dilgipa Mukul Sangma parakataha.
“Chinga chu·gimik biaprangkon a·kangahachim indiba da·o ong·enggipa sorkari, ia biaprangko bak ka·na gita Assam sorkari baksa songgigrikaha,” ine Sangma aganenba, ia pilak kamrangkon MDA sorkari, Assam sorkari baksa sikkelesa ka·aha ine parakataha.
Meghalaya a·dok ning·o ga·akgipa Khanapara-ni 0.29 sq km-ko Assam-na on·atahani gimin MDA sorkariko matnangatengon, ia kamrangko uamang chanchisoe daka gitasa nikaha ine Opposition dolni dilgipa parakataha.
“Ua somoio Meghalaya sorkarini on·atgipa lekkarango ia biaprangko Meghalaya a·dok a·kangjachimma?” ine Sangma sing·doataha.
Ia jolrango donggipa manderangara sorkarini kamo kusi ong·engama ine MDA sorkariko sing·doangengon, a·dok damgnini soi ka·grikgipa MoU-o kusi ong·jae bang·a manderangan uona re·baaha ine Sangma parakataha.
A·dok damgnini gisepo meligrikna man·jaenggipa damdok biaprangoni 3.79 sq km biaprangko gitcham sorkari, Meghalaya a·doko a·kangahachim ineba Sangma parakataha.
“Ia sorkari, manderangni ra·chakna man·gijagipa kamrangko ka·draenga,” ine ua aganaha.
