SHILLONG: Shillong songjinmani Harijan Colony-o songdongenggipa manderangko Mawbah-o donggipa Reid Provincial Chest (TB) Hospital sambaona apjitangskana sorkarini manchianiko South Shillong-ni MLA Mohendro Rapsang, raken jegalataha.
Harijan Colony-o songdongenggipa manderangko TB Hospital sambao donggipa acre gittam a·aona apjitangna gita ia biapo baditaba gadang donggipa nokko rikna blueprint-ko tarimanaha ine re·anggipa Budbar salo, a·dok sorkari Meghalaya High Court-na u·iatahachim.
Indake ong·engon, ia biapara indinan mande jelgipa biap ong·ani gimin Harijan Colony-o songdongenggipa manderangko ia biapona apjitanggenchimode bate ia biapko apchangketbatatani gita ong·gnok ine South Shillong-ni MLA, iako jegalatskaaha.
“Ia jolo manderang indinan apchangket ong·e songdong a·chatokenga aro da·o mande jelbra jelsugipa nokdangrangko ia biapona apjitanggenchimode, uan dal·bea neng·nikani ong·gnok,” ine Rapsang aganaha.
A·dokni Deputy Chief Minister Prestone Tynsong-ko gronge, iani bidingo chanchipiltaichina didigen ineba Rapsang parakataha.
South Shillong MLA-ni parakatani gitade, batanggimin chang uni Deputy Chief Minister-ko grongani somoiode ia biapko sorkari nichengengasa ine una aganatahachim.
Prestone Tynsong an·tangan, Harijan Colony-ni bidingo songako man·gipa High Level Committee-ni chairman-ba ong·achim ine nikna man·a.
Indake ong·engon, ia biapo hospital-na agrede gipinrangko dondapani gimin sorkari chanchijachina ine Rapsang parakataha.
Harijan Colony-o songdongenggipa manderangko TB Hospital sambaona apjitangna manchianiko Mawbah-ni Rangbah Shnong-ba jegalataha.