SHILLONG: Ma·mong sorkarini a·songni ramarangko namdapatna kam ka·aniko nikna man·engon, Meghalaya-ni Mawryngkneng-oni Jowai-ona re·gipa rama nosto ong·a ba namsranggijako nikna man·skaenga.
Jowai ba Jaintia Hills-ona re·angon Shillong-oni Mawryngkneng-onade rama nama indiba Mawryngkneng-ko badeahaon rama namgijako nikna man·skagen.
Ramao dal·e kolbangbang ong·a donga, jeni a·sel truk gari salgiparang aro ua ramako re·ruragiparang, rama namjani a·sel kenani dongako janaptokaha.
Rama namjani a·sel, traffic jam ong·aniara ramram katta ong·a ba ong·rongbewal gita ong·pilaha. Bebegita Mawryngkneng-oni Jowai-ona jenten sokgenchimoba Jowai Bypass sokaon, rama namjabataniko nikangna man·skagen.
Jowai Bypass-ni rama chu·gimikon kolbangbang ong·ako nikna man·gen.
Iani gimin PWD (NH) baksa agangrikaon, ‘ramako tarina Ministry of Road Transport and Highways-na proposal-ko on·gen’ ine aganaha.
Ministry, re·baenggipa jagni ba jagittam somoini ja·man ramako tarina tangka -paisako watatnaba donga ine official ka·donganiko parakataha.
