SHILLONG: Sonibar saloni Robibar salona konta 24-ni gisepo Meghalaya a·dok gimiko sak 38 manderang, COVID-19 man·daptaiaha indiba ia konta 24-ni gisepo a·doko COVID man·e sigiparang dongskataijaha.
Konta 24-ni gisepo COVID-19 man·dapgipa mande sak 38-ko channe da·o Meghalaya a·dok gimiko COVID-19 man·e dongenggiparang sak 200 gaptaiengaha.
Konta 24-ni gisepo COVID man·gipa mande sak 38-oni sak 1-de East Garo Hills-o, sak 11-de East Khasi Hills-o, sak 3-de Ri Bhoi a·jao, sak 1-de South West Garo Hills-o, sak 20-de West Garo Hills-o aro sak 2-de West Jaintia Hills a·jao ong·a.
Ia salsani gisepo Meghalaya a·dok gimiko sak 20 manderang, COVID-19-oni nampilskana man·aha.
Da·o dipet Meghalaya a·doko COVID-19 man·e sianggiparang gimik sak 1595 gapengaha aro COVID-19-oni nampilgiparangara gimik 92510 gapskaengaha.