SHILLONG: Khun Hynniewtrep National Awakening Movement (KHNAM) dolni saksakamkam MLA Adelbert Nongrum, doltangko wate, re·baenggipa 2023 bilsini Assembly election-o gipin political doloni susaskana miksongenga.
Nongrum-ni parakatani gitade, uni miksonganirang baksa apsananggipa je political doloba ua napna miksonganirang dongenga. Ua badia political dolo napgen uni giminde Nongrum, parakna gita jechakskaaha.
Koborko man·soani gitade, North Shillong-ni MLA-ko Congress dolni dilgiparang gronge agangrikeaha indiba ian baditana kingking kakket ong·achim, da·o dipet name ma·sikujaenga.
KHNAM dolni ning·o adita meligrikgijanirang dongani giminsa ua KHNAM-oni ong·katna miksongenga aro iako uni constituency-ni manderangba ma·sichakaigen ineba Nongrum parakataha.
“Angni manderang angna ka·saani giminsa aro chakpaanirangko on·ani giminsa anga changgnina kingking MDC-na aro changsa MLA-na seokako man·paaha,” ine Nongrum parakataha.
