SHILLONG: India a·songni gital President-ko seokna election-ko ong·atanio NDA-ni candidate Droupadi Murmu, skanggipa Tribal me·chik ong·e gital President-na Bristibar salo seokako man·aha.
Gital President-na election-ko ong·atanio NDA-ni candidate Droupadi Murmu, 50 percent-na baten vote-rangko man·e, Opposition dolni candidate Yashwant Sinha-ni kosako chegipa ong·aha.
Gital president-ko seokna gita election-ko re·anggipa July 18 tariko, a·songni pilak biaprangon ong·atangahachim aro Meghalaya a·dokoba gimik sak 56 MLA-rang, gital President-ko seokna gita pu·ontokahachim.
Bristibar salo, gital President-ko seokna vote-rangko chanon, NDA-ni candidate Droupadi Murmu, 5,77,777 vote-rangko man·ahachim aro uandaken vote gimikoni 50 percent-na bate man·enba chegipa ong·aha.
Murmu-ni cheani ja·mano Meghalaya a·dokni Chief Minister Conrad K Sangma, an·tangni kusi ong·aniko parakatengon, “India a·songni skanggipa Tribal me·chik ong·e President-na seokako man·ahani gimin anga Droupadi Murmu-na an·tangni namgipa skaniko on·na ska. Ian India a·songo songdongenggipa Tribal mande sakantinan gisik ra·beani sal ong·gen. Angni pagipa PA Sangma sagi da·alo dongkugenchim ong·ode iana namen katchabegenchim maina ua an·tangan Tribal-rangko iandakgipa gadangona sokatna nangnikgipa ong·achim,” ine social media-o parakataha.