TURA: Tura jillani dingtang dingtang biaprango ta·makku palaniko champengna jotton ka·ahani gimin dolsa me·chikrangni kosako FIR ka·doangaha.
FIR-o Bristibar salo, Tura police station-o ka·aha aro FIR-o parakani gitade, dolsa me·chikrang, Tura jillani dingtang dingtang biaprango ta·makku palaniko dontongchina gita dokkan dakgiparangko ka·mikkenatahachim.
Koborko on·ani gitade, ia dolni me·chikrang, dokkanrango ta·makkurangko palna on·jachina gita Health Ministry-onin a·dok sorkarirangna ge·etaniko on·manaha ine aganenba, dingtang dingtang biaprangona re·roroe dokkanrango ta·makku palaniko dontongchina aganahachim. Indake ong·genchimoba, Health Ministry-ni iandakgipa ge·etaniko internet-oniko sandion, nikna gita man·skajahachim.
Ia dolni me·chikrang, Rongram aro Tura-o donggipa dokkanrangona re·roroe, ta·makku palaniko dontongchina ge·etaha aro uandaken dokkan dakgiparang, ta·makku palaniko dontongna a·bachengtokahachim.
Dokkanrango ta·makku palaniko champengna gita niamrang dongama ine West Garo Hills a·jani Deputy Commissioner-o sing·sandiaton, da·o dipet dokkanrango ta·makku palaniko champengna niamrang dongkuja indiba skul, college aro uandakgipa biapni sambarango palanikosa champengani donga ine parakatskaaha.
West Garo Hills a·jani SP Vivekanand Singh-ni parakatani gitade, dokkanrango ta·makku palaniko champengna jotton ka·ahani gimin FIR-ko ka·aha aro iani bidingo police-rang name am·sandienga.
“Am·sandianirangko dakani ja·man chinga nanga gita ja·kurangko de·anggen,” ine SP parakataha.
