Mendipathar-o Pa Sonaram Sangma-na mande ra·aniko dakanga

Resubelpara: India-ni jakgittel man·ani bilsi 75 gapaniko gisik ra·e Azadi Ka Amrti Mahotsav (AKAM)-ko maniani bak gita Sukrobar salo Resubelpara, Mendipathar College-o Pa Sonaram R Sangma sagiko gisik ra·e una mande ra·aniko dakangna programme-ko ong·atangaha.
Pa Sonaram R Sangma, A·chik freedom fighter ba British sorkarioniko A·chik manderangko jakgittelana dakgrikgiparangoni saksa ong·a, beben ua bil-jakchi dakgrikanio bak ra·jagenchimoba ua constitutional power ba constitution-ni bilni gita dakgrikskaha. Unbaksana Pa Sonaram Sangma, Garo manderangni gisepo saksa sakgipinna ka·sagrikani ba apsan ong·aniko chanchidilgipa Garo political dilgiparangoni skanggipa dilgipa ong·a.
Azadi Ka Amrti Mahotsav-ara a·songni itihas, dakrik-bewalrangko aro jemangan a·songko jakgittelatna kam ka·angaha uamangko gisik ra·na aro mande ra·aniko dakna miksonge manienggipa programme ong·a.
Indake programme-o P Sonaram, uni nokdangni aro mahari-ma·drangko mande ra·aniko dakaha.
Uandake Pa Sonaram-ni mahari-ma·drangoni Smt. Iona R Sangma, Meghalaya sorkarini retired IAS, tom·anio bakko ra·e, Pa Sonaram-ni janggi tangani gimin aro a·chik manderangna dangdike on·angani gimin aganangaha.
Unbaksana Smti Iona R Sangma, district official-rangko Garo Hills-ni Nachirongdik-o Pa Sonaram Sangma-ni atchiram biapo uko gisik ra·na memorial stone ba kimako songchina mol·molangaha. Beben pangna bilsian uni siani salko Bakrapur-o donggipa uni gopramo manironga, indiba ua jolara Goalpara district-ni ning·osa ga·aka.
Timothy D Shira, Deputy Speaker & jolni MLA-ba tom·anio chief guest ong·e bak ra·angaha. Una agre Deputy Commissioner RP Marak, Rev Alpha Sengba Marak, Executive Secretary, Krima No.! aro Vice Principal, Mendipather college- uamangba bak ra·angtokaha.