WILLIAMNAGAR: Janata Dal (United)-ni skanggipa tom·bimonganiko re·anggipa Sonibar salo, Williamnagar Tourist Lodge-o ong·atangaha aro ia tom·bimonganio Garo Hills-ni dingtang dingtang biaprangoni bang·bea dilgiparang bakko ra·e, JDU dolo napangtokaha.
Ia tom·bimonganiko JDU-ni Meghalaya state convenor aro 2023 bilsini Meghalaya Assembly election-o JDU-ni candidate ong·e susana sienggipa Robinus T Sangma dilangaha aro tom·aniona ua Meghalaya-ni state coordinator, JDU North Eastern States-ni executive membor aro Arunachal Pradesh-ni state president Ruhi Tagung-ko rimchaksoaha.
Ia tom·anio JDU-NE-ni executive membor Ruhi Tagung, tom·bagiparangna aganprakengon, JDU dolko 2003 bilsini October 30 tariko, Kristian dilgipa George Matthew Fernandez baksana Sharad Yadav aro Bihar a·dokni Chief Minister Nitish Kumar, Bihar a·doko bikotchengaha ine parakangaha.
JDU dolo Kristian, Hindu, Muslim aro dingtang dingtang jat aro toromni manderang bakrime kamko ka·enga ine janapatengon, “Na·simang Kristian aro George Fernandez baksana ku·mong nangrimaniko namnikenga ong·ode apsan daken Meghalaya a·dokoba JDU-ko bilakatna nanga,” ine Tagung aganaha.
Meghalaya a·dokoba bang·a manderangan JDU-o naptokengaha aro ian nambegipa chin ong·a ine janapatengon, JDU dolosa manderang, chong·mot jakgitelaniko, jatni dakbewal rikbewalko rakkianio aro a·songo dingtang dingtang jat aro toromrangni meli nangrimaniko man·gen ine Tagung parakataha.
