SHILLONG: An·tangko bame on·china u·iatani ja·manoba katchipe dongengani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man Tura-ni BJP MDC aro BJP-ni Meghalaya state vice president Bernard (Rimpu) N Marak-ko Mongolbar attamo, Uttar Pradesh a·dokni Hapur a·jaoniko police-rang rim·na man·aha.
West Garo Hills SP-ni mol·molataniko man·enba, Tura Women Police Station-ni Immoral Trafficking (Prevention) Act 1956-ni Case No. 105(07) u/s 3/5/6/7-o pangchake, biaptangoni kate dongenggipa BJP-ni Meghalaya state vice president aro Garo Hills Autonomous District Council (GHADC)-ni MDC Bernard N Marak-ko sandie rim·china gita Meghalaya Police ge·etaniko on·atahachim.
Ia ge·etaniko Meghalaya a·dokni ning·o donggipa pilak police station aro police outpost-rang baksana a·songni pilak a·dokrango donggipa sipai dolrangnaba on·atahachim.
Indake ong·engon, Tura-ni MDC-ko Uttar Pradesh a·doko rim·ani ja·man da·o uko Uttar Pradesh police-rangni ning·on donkuenga aro uko rim·ani bidingo Meghalaya Police-na u·iatani ja·man, uko rimna gita Meghalaya Police-ni sipairang, Uttar Pradesh a·dokona re·angaha ine kobor on·aha.
Edenbari jolo donggipa Tura MDC-ni ‘Rimpu Bagan’-ko re·anggipa July 22 tariko police-rangni chadrapeanio, ong·gija dakgipa kamrangko rim·a man·ani ja·man ua biaptangoni kate dongengani gimin BJP-ni MDC Bernard Marak-ni kosako non-bailable arrest warrant-ko Sombar salosan Tura-ni Chief Judicial Magistrate MK Lyngdoh-ni kachari on·atahachim.
Non-bailable arrest warrant-ko on·atanio CJM-ni parakatani gitade, Bernard N Marak-ni kosako non-bailable arrest warrant-ko on·china, Investigating Officer (IO) M Hajong, CJM-ni kachariko mol·molatahachim.
“Bernard N Marak-ni kosako POCSO Act-ni dingtang dingtang section-rango pangchake Tura Women Police Station-oba mokordoma ka·aha ineba IO-ni mol·mole seatgipa chittio janapaha. Rimpu Bagan-ko chadrapeani ja·man Bernard N Marak-ko uni noko man·ejaha aro ua an·tangko rim·aoni jokna gita kate dongenga ineba IO janapaha. Ia a·selni bidingo am·sandie man·ani gitade, Rimpu Bagan-ni nokgipara Bernard Marak-an ong·a aro ia case-o uan mongsonggipa ong·e matnangako man·enggipa ong·achim,” ine Marak-ni kosako on·atgipa warrant order-o parakataha.
Rimpu Bagan-ko chadrapanio me·a bi·sa sakbri aro me·chik bi·sa saksako, chonbegipa kuturioniko man·aha aro bi·sarangna kakket bichalko on·na man·na gita aro ia case-ko name am·sandina man·na gita Bernard N Marak-ko rim·aniara namen nangchongmotgipa ong·enga ineba CJM-ni arrest warrant-o janapataha.
CJM-ni report-ko on·ani gitade, ia sakbonga bi·sarangko da·o naljokao donna aro sanna bananiko on·na gita Tura-ni District Child Protection Unit-na pakwate on·ataha.
