TURA: Tura-ni BJP MDC Bernard (Rimpu) N Marak-ni Edenbari-o donggipa ‘Rimpu Bagan’-ko police-rangni chadrapanio ong·gija kamrangko ka·engachim ine rim·na man·ani ja·man, ia baganko chalaiani bidingo magisterial inquiry-ko dakchina gita West Garo Hills a·jani District Magistrate Swapnil Tembe ge·etaniko on·angaha.
Inquiry-ko dilna gita Extra Assistant Commissioner Rezia Ch Marak-ko seokaha aro ia inquiry-ko sal 15-ni gisepon matchotate report-ko on·china District Magistrate ge·etangaha.
District Magistrate-ni ge·etaniko on·angani gitade, ia magisterial inquiry-ko dakanio, ia ‘Rimpu Bagan’-ni chong·mot nokgipako, ia biapko manderang rochakna on·anio department-ni permission dongama, ia biapo rikgipa nokni map-ara ain gita ong·ama aro iako department ra·chakachimma, ia biapo bijoliko jakkalna permission dongama aro bijolini kajinako gamachimma, ia biapo chiko jakkalna permission dongama aro chini kajinako gamachimma, ia biapo chu palna aro canteen-ko chalaina licence dongachimma, ia canteen-ko inspection ka·e food safety certificate on·achimma, ia biapo man·gipa bi·sarangko kam ka·atna jakkalachim ine matnanganirang dongani gimin ia biapo bi·sarangko donna gita permission dongachimma, ia biapo ong·atanggipa program-rangna permission-ko ra·achimma, uarangni bidingo inquiry-ko dakanggen.
An·tangko bame on·china u·iatani ja·manoba katchipe dongahani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man aro ‘Rimpu Bagan’-ni nokgipa aro Tura-ni BJP MDC Bernard (Rimpu) N Marak-ko Mongolbar attamo, Uttar Pradesh a·dokni Hapur a·jaoniko police-rang rim·na man·ahachim.
