SHILLONG: Immoral Trafficking (Prevention) Act-ni ning·o Tura Women Police Station-o ijahar ka·ako man·ani ja·man Uttar Pradesh a·dokni Hapur a·jao rim·ako man·gipa Garo Hills Autonomous District Council (GHADC)-ni MDC aro BJP Meghalaya-ni state vice president Bernard (Rimpu) N Marak-ko Bristibar salo, Tura-ona rim·baaha.
An·tangko bame on·china u·iatani ja·manoba katchipe dongahani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man Tura-ni BJP MDC-ko Mongolbar attamo, Uttar Pradesh a·dokni Hapur a·jaoniko police-rang rim·na man·ahachim.
Tura-o rimbaani ja·man Marak-ko kachario mikkangpaatna skang, be·enni gita porikka ra·e nina watatchengaha.
An·tangni ‘Rimpu Bagan’-o ong·gija kamrangko ka·na on·enga ine matnangenba, Tura MDC-ni kosako ijahar ka·ani ja·man Mongolbar salo uko Uttar Pradesh a·dokni Hapur a·jaoniko rim·aha aro uandaken Marak-ko Meghalaya a·dokni police-rang, Budbar salo Uttar Pradesh a·dokoniko rim·baaha.
Re·anggipa July-ni 22 tariko Tura-ni Police-rang, ‘Rimpu Bagan’-ko chadrapeani ja·man sak 68 manderangko rim·e bi·sa sakbongako jokatna man·ahachim.
Marak-ni baganko chadrapeanio police-rang bang·bea churangko, condom-rangko aro ma·manti bosturangkoba man·ahachim.
Ia ‘Rimpu Bagan’-ko chalaiani bidingo magisterial inquiry-ko dakchina gitaba West Garo Hills a·jani District Magistrate, Budbar salo ge·etaniko on·angaha.
