Tura: “Ujjwal Bharat Ujjwal Bhavishya – Power @2047”-ko, Azadi ka Amrit Mahotsav-ni gita, July 25 tarikoni July 30 tarikona a·song gimikni, ge 773 district-rango maniani da·al salni bako matchotangaha. West Garo Hills-ni, Tura-oba apsan daken, DRDA Hall-o maniangaha, jeon Meghalaya a·dokni Chief Minister aro North Tura-ni MLA Thomas A Sangma, manianiona, Chief Guest ong·e re·baaha. Programe-ko, Ministry of Power, West Garo Hills District Administration, PGCIL aro MePDCL, West Garo Hills, Tura baksa nangrime ong·atangaha.
Tom·aniona chief guest ong·e sokbagipa, Thomas A Sangma, power department-o kam ka·gipa dingtang dingtang official-rangko, manderangni namgnina, sorkarini on·gmin scheme-rangko chu·sokate kam ka·ahanina mittele aganangaha. Neng·nikanirangko man·a baksana rakbegipa kamrang ong·genchimoba, a·jao dongenggipa nok geantina bijoliko sokatna gita kamrangko krenge ka·ahaninaba ua mittele aganangaha. Song damsako janapjole, ua badia songni badiaba nokdangrangde neng·nikanirangko man·engani a·sel bijolirangko man·pakuja, indiba bijlolirangna tangkarangko gamna gita nangaha, maina songrangko am·sandie ba census ka·anio uamangni nokba napangpaaha, ine ua aganangaha. Indake, neng·nikanirangko man·genchimoba, kamrangko ka·enggiparang baksa nangrime kam ka·a baksana, maibakai indakgipa obostarang ong·taigenchim ong·ode namatna gita ka·sine kamrangko ka·china, ua aganangaha.
Indake, bijolini namgnirangni gimin aganengon, mandeni salanti janggi tanganio bijoliko nanga aro salantio ka·enggipa kamrangko chu·sokatna gita bijoliko nanga, uni gimin bijoliko tik ong·e aro nambate on·a gita nanga, ine ua aganangaha. Bijoliko nambatatna kam ka·anirangko manderangna parakatna aro kam ka·anirango manderangko ku·mong nangrime bak ra·atna gita, Bijli Mahotsav ba Ujjwal Bhavishya- Power @2024-ni gimin, North Garo Hills-ni, Gokulgre MFC hall-o manderangna talate on·aniko dakangaha.
Tom·aniona, chief guest ong·e re·bagipa, Bajengdoba-ni MLA, Pongseng Marak, manderangni namgnina, a·dok sorkarini dingtang dingtang scheme aro project-rangko bikote kam ka·ani gimin agana talate on·angaha. Sorkarini namnamgipa scheme-rangoni mingsara, bijoliko namdapatna kam ka·anian ong·a, maina salantio kam ka·anio manderang, bijoliko nanga aro kamrangko chu·sokatna gita bang·a kamrangon bijoligri man·ja, ine ua aganangaha.
Indake, Ujjwal Bharat aro Ujjwal Bhavishya-ni gita, a·jao donggipa geanti nokdangrangna bijolirangko on·a gita miksongengon, bijoliko name on·a gita kam ka·anirang, official-rang aro power department-ni jako ong·gnok, ine Marak aganangaha.
”Rakbegipa kamko ka·a baksana an·tangtangni janggirangko on·kange, power department-o kamko ka·enggipa manderang, maming neng·nikani gri bijolirangko on·a gita rake kamrangko ka·enga,” ine ua aganangkuaha.
Indake, Marak ma·mong sorkari aro a·dok sorkarini manderangni namgnina dingtang dingtang scheme-rangko on·e kam ka·ani giminba aganangaha. Scheme-rangko chu·sokatna name kam ka·na gita, ua manderangko ku·mong nangrimaniko mesokchinaba aganangaha.
Tom·aniona, Additional Deputy Commissioner, Jude Rangku T Sangma-ba re·baaha aro programme-ni miksongani gimin talate on·a baksana, Ujjwal Bharat Ujjwal Bhavishya-ra, Prime Minister Narendra Modi-ni, nokdang geantina bijoliko on·a kam ka·ani ong·a ine aganangaha.
”Batangimin bilsirango, bijolirangko on·ani komia aro iani a·selan salantio kam ka·na gita manderang neng·nikaniko chagrongronga. Indiba, bijolirangko nambate tarianichi aro nambate on·anichi an·ching altue janggi tangna gita man·engaha,” ine Sangma aganangaha.
Indake, programme-o, smart meter-ni namgni aro nokrango bijoliko on·ani, songo noko bijoliko on·ani, bijoliko nambate sokatani, ra·chakani biap aro a·song ge·sa grid ge·sa, jakkaltaina man·gipa bosturang aro manderangna an·tangna on·gimin bilrangko masie ra·ani giminba noksarangko mesoke on·angaha.
