SHILLONG: Garo Hills-o BJP-ni membor-rangko aro dolna kam ka·enggipa manderangko dokkol ka·na jotton ka·aha ine matnangenba, West Garo Hills a·jani Deputy Commissioner Swapnil Tembe aro Superintendent of Police (SP) VS Rathore-ko ra·galatchina gita BJP Meghalaya-ni state president Ernest Mawrie dabiangaha.
Iani bidingo BJP-ni state president, Sombar salo a·dokni Governor Satya Pal Malik-ko grongenba agangrikangaha.
BJP-ni state president Ernest Mawrie-ni parakatani gitade, re·anggipa July-ni 25 tariko, BJP-ni general secretary-ko West Garo Hills a·jani SP, maming a·sel gri thanaona okamatenba, thanao adita kontarangna dongate roahachim. BJP-ni state vice president aro Tura-ni MDC Bernard N Marak-ko maming a·sel gri rim·anina jegale BJP-ni membor-rang, tom·tome re·jomaniko dakna am·on, BJP-ni membor-rangna West Garo Hills a·jani Deputy Commissioner, permission-ko on·skajahachim ineba Mawrie parakataha.
“Chinga a·dokni Governor-na memorandum-ko on·baaha aro ua ia a·selni bidingo jakgitele inquiry-ko dakatna ku·rachakaniko on·ataha. Chingni ia somoio mongsonggipa dabianiara West Garo Hills a·jani DC aro SP-ko ra·galchina dabianian ong·enga,” ine Governor-ko grongeani ja·man BJP-ni state president parakataha.
Tura-ni MDC-ko rim·ani bidingo jakgitele inquiry-ko dakna man·na gitade West Garo Hills a·jani deputy commissioner aro SP-ko ra·galchengna nanggen ineba Mawrie parakataha.
“Kakket bichalko man·na gita chinga West Garo Hills-ni DC aro SP-ko ra·galchina nangnikenga,” ine ua aganaha.