TURA: Tura-ni fashion designer Daisy Momin-ni jaktangchi tarigipa ganding chindingrangko, adita salrangna skang Thailand a·songni Bangkok songjinmao ong·atanggipa Northeast India Festival 2022-o dingtang dingtang model-rangchi gane chine mesokangaha.
Tura Bonepa A·tilla-oni Daisy Christine Momin saksa, Fashion Designing-o National Award-ko aro dingtang dingtang upattirangko man·gimin A·chik me·chik ong·achim aro ua jattangni ganding chindingrangko tarianio jakgimingipa ong·e ia Northeast India Festival-oba, uni ganding chindingrangko mesokna gita seokako man·aha.
Uni ia Northeast India Festival-o an·tangni tarigimin ganding chindingrangko mesokna man·ahani gimin West Garo Hills a·jani Deputy Commissioner Swapnil Tembe, District Commerce & Industries Centre aro a·jao songdongenggipa manderangba una mittelpilaniko aro nama skanirangko parakattokaha.
