TURA: Batanggimin bilsirango Khasi Hills jolrangnade MeECL-o kam ka·giparangko rakkidapahaoba Garo Hills-nade kam ka·giparangko rakkijahani gimin da·o Garo Hills-naba kam ka·giparangko rakkidapchina dabie, Garo Students Union-Central Executive Committee (GSU-CEC), a·dokni Deputy Chief Minister Prestone Tynsong-na sedoataha.
Deputy Chief Minister-na sedoatgipa chittio, GSU-CEC-ni parakatani gitade, 2017 aro 2018 bilsirango gital kamo rakkigipa Garo Hills-ni jugali ba dakchakgiparangko Khasi Hills-ni dingtang dingtang biaprangosa kamo donatahachim indiba Khasi Hills-onikode saksakoba Garo Hills-ona rimbae kamo donatskajahachim.
Uni ja·man, 2020 bilsio MeECL-ni junior engineer-na kam ka·giparangko rakkianio Meghalaya Job Reservation Policy 1972-o dongimin niam 40-40-koba Meghalaya sorkari ja·rikjaha aro iandakgipa kamrangara Garo Hills-ko mikchepani gita ong·aha ine GSU-CEC-ni general secretary Bibian G Momin parakataha.
“Chingni RTI ka·e man·ani gitade, 2020 bilsini June 11 tarikoba Khasi Hills-ni sak 20 candidate-rangko a·a on·gilgiparang ine MeECL-o rakkidapaha aro uni ja·man apsan 2020 bilsini June 29 tarikoba Khasi Hills-ni sak 52 candidate-rangko contractual basis-o ra·e gimikkon Khasi Hills-o donattokaha,” ine GSU-CEC-ni general secretary parakataha.
GSU-CEC-ni parakatani gitade, 2019 aro 2020 bilsirango Nongalbibra aro Williamnagar-ni Tower line aro Distribution department-o kam ka·enggipa bang·a manderangkon Khasi Hills-ona ra·jitange kamo donataha indiba Khasi Hills-onikode saksakoba Garo Hills-ona rimbae kamo donatskajahachim.
Shillong-ni head office-rango Junior Assistant aro Administrative Assistant-na A·chikrangoni saksakoba kamo rakkijaha ineba GSU-ni general secretary parakataha.
“Uni gimin ia chittiko seataoni salsnini gisepon Garo Hills-naba MeECL-o kam ka·giparangko rakkidape on·china chinga dabienga aro ia salsnini gisepo chingni dabianiko knachakjagenchimode jingjengatanirangko dakna draatako man·gen,” ine GSU-CEC-ni general secretary Bibian Momin mikrakataniko on·ataha.
Garo Hills-o bijoliko nambate on·china dabie aro kam ka·giparangko rakkidapchina dabie adita salrangna skangsan, GSU aro dingtang dingtang dolrang, East Garo Hills a·jao jingjengaanirangko dakangahachim ine nikna man·a.