Kamko ka·anio changa sapani baksana namgipa gisikko jakkalchina Conrad didia

SHILLONG: An·tangtangna on·gimin daitorangko chu·sokatna kamko ka·engon, an·tangtangni changa sapani baksana namgipa gisikrangko jakkalchina gita a·dokni Chief Minister Conrad K Sangma, a·dokni officer-rangko didiangaha.
Bristibar salo, Meghalaya sorkarini ning·o donggipa Development Commissioner’s Office, NITI Aayog-ni Development Monitoring Office baksa nangrime, Meghalaya Next Leaders Workshop-ko Shillong songjinmani State Convention Centre-o ong·atanio a·dokni Chief Minister, ia kattarangko aganangaha.
Ia workshop-ko ong·atna gita Bill and Melinda Gates Foundation dakchake on·aha aro ia workshop-o Problem Driven Adaptation (PDIA)-ko tarigiparangoni saksa Dr Michael Woolock, Massachusetts-o donggipa Suffolk University-oni Dr Aron Manoharan aro gipin official-rangba dongpae bak ra·angaha.
Chu·sokaniko man·na gitade, name chanchibewalgipa gisikkoba nangchongmota ine janapangengon, “Nang·o name chanchibewalgipa gisik dongjagenchimode, nang·o jegita changa sapanirang donggenchimoba maming dingtangani dongjawa,” ine Sangma parakataha.
Dingtang dingtang department-rangko nangrime kam ka·china didiangengon, kamrangko nambate chu·sokatna gitade department-rang, an·tangari kamko ka·aigija, dingtang dingtang department-rang baksa nangrimani gnangsa kamko ka·na nanggen ine Chief Minister parakataha.
“Namgipa dolko ong·atna gitade an·ching an·ching baksa kam ka·rimskarangni changa sapanirangkoba ma·sie ra·na nanga aro uamangko kam ka·na on·na nanga,” ineba Sangma aganaha.