M’laya-ni koelarangko B’desh a·songona watengkua: Hek

SHILLONG: Meghalaya a·doko niam gri koela bikotaniko champengatahaoba, a·dokni dingtang dingtang biaprangoniko Assam a·dokona ra·ange, Bangladesh a·songona watengkua ine Chief Minister-ni adviser aro BJP-ni MLA Alexander Laloo Hek parakataha.

“A·dokni koelarangko Bangladesh a·songona da·oba watengkua aro iako an·ching jegalna man·jawa. Salantian koela salgipa truck garirangni re·ruraaniko pilakan nikna man·enga,” ine Bristibar salo Hek parakataha.

Meghalaya a·doko niam gri koela bikotaniko aro salruraaniko champengna gita a·dok sorkari ja·ku de·na nangchongmota ineba a·dokni gitcham Cabinet Minister aganaha.

“Meghalaya a·doko niam gita koela bikotaniko a·bachengna man·kujaskal iandake niam gri koela badinganiko sorkari chu·gimik dontongatna nanga,” ine Hek aganaha.

Meghalaya a·doko niam gri koela badinganichi a·dok sorkari maming namgnirangko man·jaenga ineba BJP-ni MLA parakataha.

Indake ong·engon, niam gri koela bikotani aro salruraani bidingo Parliament-o sing·doahani gimin Chief Minister-ni adviser, Rajya Sabha-ni MP Rakesh Sinha-ko mittelpilataha.

“Meghalaya a·doko iandake niam gri kamrangko ka·enganina Sharma-ni jajrengchakaniko mesokahani gimin anga uko mittelpilna ska,” ine Hek aganaha.

Meghalaya a·doko niam gri bikotenggipa koelarangko Assam-oniko ra·baenga ine Bangladesh a·songona watatenga ine adita salrangna skangsan, TMC-ni MLA aro Opposition dolni dilgipa Dr Mukul Sangma-ba parakatahachim.

Adita salrangna skangsan, Union Coal, Mines & Parliamentary Affairs Minister Prahlad Joshi-ni Meghalaya a·doko koela bikotani bidingo Rajya Sabha-o agangipa kattarangara kakket ong·ja ine nikna man·ahachim.

Get real time updates directly on your device, subscribe now.

Comments are closed.