Gurugram hospital-o Rosy Sangma-ni sianina, official sakgnini kosako CBI, FIR ka·a

NEW DELHI: Re·anggipa 2021 bilsio, air hostess-ni kamko ka·enggipa Rosy Sangma-ni Gurugram hospital-o sianganina Central Bureau of Investigation (CBI)-ni gita, ia hospital-ni managing director aro hospital-ni dentist-ni kosako FIR ka·doangaha ine kobor on·aha.

Re·anggipa bilsini June jao, airhostess-ni kamko ka·enggipa Rosy Sangma, an·chi pakrurue saaniko man·ahani gimin uni jonggipa sakgni aro uni depante nanggipa Samuel Sangma, uko Gurugram-o donggipa Alfaa Health Care Hospital-ona rimangahachim indiba hospital-o una nanga gita simsak nirokanirangko aro somoi gita sanna bananirangko on·jahani a·sel Rosy siangna gita nangahachim. Iani ja·mano uni depante nanggipa Samuel Sangma, uni ma·degipana simsak nirokanirangko on·jahani gimin aro somoi gita sanna bananirangko on·jahani gimin hospital-ni official-rangko matnangon, uamang ukoba kragija dake jak sokahachim aro ja·mano Samuel-ni manggisikoba uni dongchakenggipa hotel-ni kuturio dingdee dongakosa man·aiahachim.

Ia a·selni bidingo salgro salaramni dingtang dingtang dolrangsan ong·aigija, Meghalaya a·dokni Governor Satya Pal Malik, Chief Minister Conrad K Sangma, Tura-ni MP Agatha K Sangma, Opposition dolni dilgipa Mukul Sangma aro gipin dilgiparangba ma·mong sorkarina sedoattokaha aro ia a·selko CBI-chi inquiry dakchina dabiattokahachim.

Uandaken iani bidingo CBI-chi inquiry dakchina Home Affairs Ministry ge·etaniko on·angaha aro bilsisana inquiry-ko dakani ja·man, ia hospital-ni managing director aro dentist-ni kosako CBI, re·anggipa Budbar salo FIR ka·doangaha.

CBI-ni FIR-o parakani gitade, sianggipa Rosy Sangma, 2021 bilsini June 23 tariko ok re·rurue aro somoi nikani (period)-ni a·sel an·chi ong·rurue, uni jak samgni aro jakrani ja·ao saknaaniko man·ahani gimin uko uni jonggipa sakgni aro uni gritang Samuel Sangma, June 24 tarik pring 6:00 bajio Gurgaon-ni Basai Road Sector 10-o donggipa Alfaa Health Care Hospital-ona ra·baahachim indiba hospital-ona rimbaani ja·man hospital-ni managing director Dr Anuj Bishnoi aro dentist Dr Anjali Ashk, una somoi gita sanna bananirangko aro simsak nirokaniko on·jahani a·selsa ua siaha ine ma·sina man·ahachim.

“Alfaa Health Care Hospital-ni Dr Anjali Ashk saksa dentist-sa ong·e gynaecology-ni kamrangko ma·sipagipa ong·jagenchimoba, an·chi pakrurue saenggipa Rosy Sangma-ko sanskaaha aro una unit bri an·chiko on·china aro gynaecologist-ni ku·pattianikoba ra·china gita see donangahachim. Indake ong·genchimoba, konta dokni gisepo Rosy Sangma-ko sanna gita gynaecologist-ko okamatchipjaha aro konta bongani gisepo una an·chiko on·jahani a·selsa ua siaha,” ineba CBI-ni FIR-o parakaha.

“Hospital-ni managing director Dr Anuj Bishnoi-na June 24 tarik pring 6 bajion, bilonge sagipa mande saksako rimbaaha ine koborko on·atahachim indiba CCTV-niko nikna man·ani gitade ua pring 10:26 bajiosa hospital-o napaha aro uandaken apsan salni 12:30 bajimango ua, SHO police station Bijwasan (Delhi Police)-na chitti seatenba, bilonge saako rimbagipa mande hospital-o siaha ine u·iataha. Iani ja·manoba ua attamni 1:30 bajimango SHO PS Bijwasan-na chitti seattaienba, ia me·chikna bisi on·aha ine chanchipenga aro uko hospital-ni ICU-o donataha indiba ua namna gita man·jaenga ine police-rangna u·iattaiaha,” ine CBI-ni FIR-o parakaha.

Get real time updates directly on your device, subscribe now.

Comments are closed.