TURA: Meghalaya a·doko casino aro uandakgipa joa kal·anirangko niamo ong·atna a·dok sorkarini miksonganiko Tura Garo Senior Citizens Forum (TGSCF) jegalatenba, iani bidingo a·dokni Governor-na sedoataha.
TGSCF-ni parakatani gitade, adita salrangna skang iani bidingo uamang, Garo, Khasi aro Jaintia Hills-ni pilak Mondolini dilgiparang aro dingtang dingtang dolrang baksa tom·e chanchirimangon, pilakan a·doko joa kal·aniko niamo ong·atna sorkariko miksonganiko raken jegaltokaha.
“Ia tom·anio gipin political dolni dilgiparangba dongpae bakko ra·angaha indiba MDA sorkarionide darangba dongpae bakko ra·ejaha. Meghalaya a·doko joa kal·aniko niamo ong·atgenchimode uan jatni bebera·ani aro daka rikanirango nangchakeaniko ra·bagen aro chadamberangni janggi tanganio namgija bewalko ra·baani gita ong·gen ine ia tom·anio bak ra·gipa pilak membor-rangan, a·doko joa kal·aniko niamo ong·atna miksonganiko raken jegaltokaha,” ine Governor-na sedoatgipa chittio TGSCF parakataha.
1980 bilsirango Meghalaya a·doko Teer kal·aniko a·bachengatani a·selan bang·a nokdangrangan rusiaona sokaha ine janapatengon, a·doko joa kal·aniko niamo ong·atna manchianiko champengna gita ta·raken ja·kuko de·china TGSCF, a·dokni Governor-ko didiataha.
Indake ong·engon, Medical Council of India (MCI)-ni dongimin niam gita Tura Medical College-ko kulina Tura Civil Hospital-o da·onan building-rangko rikdapa dongkujaenga ineba TGSCF parakataha.
TGSCF-ni parakatani gitade, Tura Medical College-ko kulina gita 2013 bilsion ma·mong sorkari gong kror 189 tangkarangko chame on·ahachim aro ia medical college-na nangdapenggipa building-rangko rikani bidingo uamang changni chang Chief Minister-ko gronge memorandum-rangko on·ahaoba da·onan iani bidingo maming ku·rachakanirangko on·na dongkujachim.
Ia medical college-ko gipin biapchi ra·jitangskana miksonganirang dongengakon ineba TGSCF, iani bidingo niatchina gita a·dokni Governor-ko didiataha.