SHILLONG: Meghalaya Energy Corporation Limited (MeECL), gro nanggipa bill-rangko chotna jotton ka·enga ine Power portfolio-ko jako ra·gipa Deputy Chief Minister Prestone Tynsong aganaha. Karkana bang·gipa Umiam aro Byrnihat a·jolrangni dal·dalgipa karkanarang 2005 bilsionin gong kror 44-mang ong·pilgipa uamangni bijolini bill-rangko gamja ine National Hynniewtrap People Federation-ni matnange RTI ka·anina aganchakao ua ia kattarangko aganaha.
“Ua bill gamgijagiparang daikoba man·a nanga. Aroba uamang bill gamgija ru·utroroatnani giminba uamang daiko bang·bate gamna nanga. Chinga tik tak dake kamrangko ka·engaha aro man·a dipet ta·raken bill-rangko gamchina uamangko aganaha. Ia kamrangko chinga da·on ka·engaha,” ine Tynsong aganaha.
Gro donggipa bill-rangko watna sorkari miksonga dongja, ua aganaha.
2018-19-o gong kror 20-mang bangki donggipa bill-rangna one-time settlement (OTS)-ko a·dok sorkari parakataha uko janape jeon daiko watahachim indake OTS scheme bon·aha, ua aganaha. Uamang dai baksa gro donggipa bilrangko gamna nanggen,” ua agandapaha.
Bill-rangko gamchina u·iatanirangko sokatoba uamang gamna man·jaha uni gimin mittam bill gamgijagiparangni bijoli connection-rangko den·aha, Tynsong aganaha.
“Uandake coke, cement ba jeba gipin gipin karkana unit-rang ong·chong jemangan bijolini billrang bang·e donga uamangna corporation, bill-rangko gamchina ong·jaode bijoliko den·gnok ine u·iatani lekkarangko uamangna sokataha,” ua agandapaha.
