SHILLONG: Meghalaya a·doko 108 emergency service-ko chalaina gita je company-kon sorkari ra·bana siengachim, a·dokni manderangna name dangdike on·na man·na nanga ine Robibar salo, a·dokni gitcham Health Minister aro BJP-ni dilgipa Alexander Laloo Hek parakataha.
Iani bidingo kobor ra·timgipa manderang baksa agangrikengon, 108 emergency service-ko chalaina sienggipa gital company, 108-o kam ka·enggipa manderangkoba name nirok sandina man·na nanga ine Hek aganaha.
“108 emergency service-ko nambate chalaianikosa chinga nikna sikenga aro iako chalaianio a·dokni manderangna maming neng·nikanirangko ra·bana nangja,” ineba Hek, jean Chief Minister-ni adviser-ba ong·engachim, Robibar salo, kobor ra·timgiparangna aganaha.
Ua saksa a·dokni gitcham Health Minister ong·e, a·doko 108 service-ni kam dontonganiko nikna sikja ineba ua aganaha.
“Kamko nambate ka·na man·gipa gital company-ko man·ode nambata aro iana gital tender-ko sorkarini on·aniara namaha,” ine a·dokni gitcham Health Minister parakataha.
GVK EMRI-ni kamo kusi ong·jae kam ka·giparang jingjengatsimani a·sel 108 service-ni kamrangko ka·anio nangchakeaniko man·ahani gimin an·tangni suk ong·gijaniko parakatengon, 108 emergency service-ko chalaina gita gital company jako ra·ahaon, mikkangchi iandakgipa obostarang ong·taijachina ine Hek parakataha.
Hek-ni parakatani gitade, 108 emergency service-ko sorkari an·tangde jako ra·e chalaina man·jachim.
“Ia kamkode private company-rangnasa on·na gita nangao ga·akaia aro 108 service-o kam ka·giparangode contract basis-osa kamo rakkiani gimin kam ka·giparangko sorkari regularise ka·na man·ja. Kam ka·giparangna simsak nirokaniko on·ani kamde 108 service-ko chalaienggipa company-ni daitosa ong·a,” ine Chief Minister-ni adviser parakataha.
Meghalaya a·doko 108 emergency service-ko chalaigipa GVK-EMRI-ko bon·atenba a·dok sorkari, gital company-ko rimbaskana gita gital dake tender-ko on·taiahachim ine nikna man·a.
