SHILLONG: Adita salrangna skang, Tura-ni Edenbari jolo donggipa ‘Rimpu Bagan’-ko chadrapani ja·man Tura-ni BJP MDC Bernard (Rimpu) N Marak-ko police-rangni rim·anio politics-ni gita jak dongama dongja name aganna man·kujawa ine Sombar salo, BJP-ni MLA aro BJP-ni national executive membor Alexander Laloo Hek parakataha.
BJP-ni MDC-ko rim·anio National People’s Party (NPP) jak dongna nanga ine Garo Hills-o BJP-ni dilgiparang matnangtokenggipani bidingo sing·anina Hek, ia kattarangko aganaha.
“BJP-ni MDC-ko rim·anio political dolrangni gisepo meligrikgija dongani a·sel rim·a ine aganna da·o dipet agre seng·gnangdugakuenga,” ine Hek aganaha.
Marak-ko rim·anio politics-ni gita jak dongama dongja name aganna man·kujawa ine talataniko on·angengon, Garo Hills-o BJP-ni membor-rangko police-rang kragija dake kal·ake roa ine matnangenggipani giminde ua police-rangko matnange aganskaaha.
“BJP-ni dilgiparang aro BJP-na kam ka·enggiparang mai namgija kamko ka·ahani gimin Garo Hills-ni police-rang, uamangko kal·ake rona jotton ka·enga,” ine Hek sing·doangaha.
BJP-ni dilgiparangko police station-ona okamate kal·ake rona jotton ka·aha ine ine janapatengon, BJP-ni dilgiparangko walni somoio okamate, konta chet konta skurangna police station-o asongate donaniara ra·chakna man·gijagipa kam ong·a ine Hek parakataha.
Tura-ni MDC-ko rim·ani bidingo independent inquiry-ko dakchina BJP-ni dabienggipani bidingo Hek-ba an·tangni chakpaaniko parakataha.
“Sorkariko rikaniode dingtang dingtang dolrang nangrime kamko ka·na man·aia indiba election-ni somoirangode pilak dolrangan an·tangtangni gitasa susaengani gimin kamrangko an·tangtangni miksongani gitasa ka·a. Tura-ni MDC-ko rim·aniara politics-ni gita maiba meligrikgijani a·selsa rim·ahama, da·o dipet anga aganna man·kujawa,” ine Hek aganaha.