SHILLONG: Meghalaya a·dokni dingtang dingtang a·jarango kam ka·enggiparangko gital dake seokpiltaienba, a·dokni BJP dolko bilakbatgnok ine Budbar salo, BJP Meghalaya-ni state president Ernest Mawrie parakataha.
“Je constituency-rangon chinga chena krae nikengachim, uandakgipa biaprangoni dam 20 constituency-rangona baten chinga September jani bon·angachibarade booth level organisation-rangko chu·sokatna jotton ka·gen. Iani bidingo state election committee-na ta·raken u·iatgen. Je MLA-rangan chingni dolo napna miksongengachim, chinga uamang pilakkon rimchaksogen aro November jani gisepode komibeoba sak 5-oni sak 10-mangni gita MLA-rang ching baksa bakrimena ka·dongenga,” ine Mawrie aganaha.
Mawrie-ni parakatani gitade, badiaba badiaba constituency-rangode party tikitna dorgasto galenggipa sak 5 ba sak 6 candidate-rang dongengani gimin pilakan apsan doltangna kamko ka·na man·na gita uamang dingtangmancha cholko ra·gatenga.
“Je candidate-rangni report-rangko chinga chu·ongnika, uandakgipa candidate-rang party tikitko man·gen,” ine BJP-ni state president parakataha.
A·dokni ning·o donggipa pilak mondalrangoba BJP-ni committee-rangko gital dake taripiltaigen ineba Mawrie parakataha.
“Je biaprangon doltangni candidate donge, gipin party-rango MLA ong·enggipa manderang BJP-o napgenchim, iandakgipa biaprangode BJP-na kam ka·enggipa manderangna agan-ku·pattianirangkode on·e candidate chakpaaniko on·china didigen,” ineba Mawrie parakataha.
Re·baenggipa 2023 bilsini Assembly election-o bang·bata seat-rangko chena kam ka·anio bakan a·dokni pilak mondalrango membor-rangko biming segatna gita program-ko a·bachengatgen ineba BJP-ni state president parakataha.
